ஆளுடைய பிள்ளையார் திருவந்தாதி

ஒளிறு மணிப்பணி நாட்டும் உலகத்தும்உம் பருள்ளும்
வெளிறு படர்ச்சில நிற்பதுண்டே மிண்டி மீன்உகளும்
அளறு வயற்சண்பை நாதன் அமுதப் பதிகமென்னும்
களிறு விடப்புகு மேல்தொண்டர் பாடுங் கவிதைகளே.

கவிக்குத் தகுவன கண்ணுக் கினியன கேட்கில்இன்பம்
செவிக்குத் தகுவன சிந்தைக் குரியன பைந்தரளம்
நவிக்கட் சிறுமியர் முற்றில் முகந்துதஞ் சிற்றில்தொறும்
குவிக்கத் திரைபரக் குங்கொச்சை நாதன் குரைகழலே.

- நம்பியாண்டார் நம்பி