அடி-232: மன்றமும் - அவை கூடுகின்ற அம்பலமாகிய மர நிழலிலும் (அவன் உறைவான்) பொதியிலும் - வழிப் போவார் தங்குதற் பொருட்டு அறமாக அமைக்கப் பட்ட பொது இல்லங்களிலும் (அவன் உறைவான்) கந்து உடை நிலையிலும் - (தறியை உடைய நிலையங்களிலும் (அவன் உறைவான். தறியாவது சிவலிங்கம் இது வட மொழியில் ‘தாணு’ எனப்படும் இஃது உள்ள நிலையங்களில் முருகன் அம்மை அப்பர்க்குப் பிள்ளையாய் இருப்பான். தறி சிவலிங்கம் ஆதலிய, “கன்றாப்பூர் நடுதறியைக் காணலாமே”¹ என்னும் அப்பர் திருமொழியால் அறிக. ஆதீண்டு குற்றி யுள்ள இடத்தில் முருகனை வழிபடுதல் காணப்படாமையால் “தறி” என்பதற்கு, ‘ஆ தீண்டு குற்றி’ என உரைத்தல் பொருந்துவதன்று.)

அடி-248: குற மகள் - இளையளாகிய குறத்தி. (முதியளாயின் ‘மூதாட்டி’ எனப்படுவாளல்லது வாளா “மகள்” எனப்படாள்.)

அடி-233: மாண் தலைக் கொடியோடு அமை வர மண்ணி, மாட்சிமைப் பட்ட, தலைமையை யுடைய கோழிக் கொடியோடு பொருந்துதல் வரத் தூய்மை செய்து. (‘ஆண்டலை’ எனப் பாடம் ஓதி, ‘ஆண்டலையாவது கோழி’ என்று உரைப்பாரும் உளர்.)

அடி-234: ஐயவி நெய்யோடு அப்பி - வெண்சிறு கடுகை (மணம் மிகுதற் பொருட்டு) நெய்யோடு கலந்து நிரம்பப் பொருத்தி.

அடி-235: கொழு மலர் சிதறி - செழிப்பான மலர்களை எங்கும் இறைத்து.

அடி-237: வெண் பொரி சிதறி - வெண்மையான பொரிகளையும் இறைத்து.

அடி-238, 239, 240: மத வலி நிலைஇய மா தாள் கொழு விடைக் குருதியொடு விரைஇய தூவெள் அரிசி சில் பலிச் செய்து - செருக்கும், வலிமையும் நிலை பெற்ற, பருத்த கால்களையுடைய செம்மறியாட்டுக் கிடாயினது இரத்தத் தோடு சேர்த்துப் பிசைந்த, தூய, வெண்மையான அரிசியைச் சிறு படையலாக வைத்து. பல் பிரம்பு இரீஇ - பல இடங்களில் பிரம்புகளை நாட்டி. (பிரம்பு, பிரப்பங் கூடைகளும் ஆம். அவற்றில் பண்டங்கள் நிரம்பியிருக்கும்.

அடி-241: சிறு பசுமஞ்சளொடு நறு விரை தெளித்து - (அரைத்த, சிறிய பாடம் செய்யப்படாத பச்சை மஞ்சளோடே நல்ல மணம் கலந்த நீரை எங்கும் தெளித்து.

அடி-242, 243: பெரு தண் கணவீர நறு தண் மாலை துணை அற அறுத்துத் தூங்க நாற்றி - பெரிய குளிர்ந்த செவ்வலரிப் பூவால் ஆகிய, மணம் கமழும் குளிர்ந்த மாலைகளை ஓர் அளவாக

1. திருமுறை - 6.61