ஒன்று வேண்டுவ லுன்னத கோமகன்
மன்றி ரக்ஷைமு டித்தவ ரம்பினில்
அன்ற டைந்தவ ரும்பெரும் பாட்டினை
இன்றி சைக்கமன் றாடுகின் றேனென்றான்.   

பத்தி யென்னும்ப வித்திரை பாங்குளார்
சித்த மும்மவர் செப்பிய சீர்மையும்
உய்த்து ணர்ந்துள்ளு வப்பொடு மொள்ளிய
வித்த கக்கனி வாய்மலர் விண்டனள்.       

எம்மு யிர்த்துணை யீரிறை வன்னொரு
செம்மல் மேயசி லுனையின் பாடுகள்
மம்மர் நீங்கிய வானவர்க் காயினும்
அம்ம சொல்லிய ளவிடற் காவதோ.        

தரையில் யாவரும் பாவிகள் தண்டனை
நிரைய நித்திய மாநடு நின்றவர்
ஒருவ ரேயொருங் கத்தரித் தார்சிறு
வரையில் யாவரந் நோவைவ குப்பரே.      

பாரை வானப்ப ரப்பைப்ப ரவையை
வீரை வாலுகத் தையள விட்டிடுஞ்
சீர ராயினும் ஜேசுத்த ரித்தவக்
கோர வாதைகு ணித்திடற் பாலரோ.        

வாக்கொன் றிற்குளிவ் வையம டக்கிய
கோக்கு மாரனல் லாலிக்கு வலயந்
தீக்க நின்றசி னக்கொடுந் தீத்திரள்
ஆக்கை மீதுத்த ரிக்கவல் லாரெவர்.       

பாழி யம்புவி யுய்யப்ப ரன்சுதன்
வாழி மேனிவ தைப்புண்ட நீர்மையை
ஊழி யூழிநி னைத்தழு தொண்கணீர்
ஆழி யாகவு குப்பினு மாற்றுமோ.          

வையம் விண்டிடும் வான்கதிர் மாய்ந்திடுஞ்
சைய முந்தக ருந்தலை சாய்ந்தெனில்
ஐயன் மேயவ வஸ்தையை யாய்ந்துரை
செய்ய யானொரு சின்மதி யோதரம்.