:: TVU ::

351

	மறமெ லாங்குடி புகுந்துள மானவ ருளத்தில் அறமெ லாங்குடி போயதவ் வணிநக ரொருவிப் புறமெ லாம்புலை நிரம்பின பொருவரு ஞானத் திறமெ லாநகைப் படுவன தீவினை கதிப்ப.	47

	மெய்யு ரைப்பவர் யாவரு மடம்படு மிலேச்சர் பொய்யு ரைப்பவ ரேயதி புண்ணிய புருஷர் கையு லோபரே மதியுளார் கசிந்துப காரஞ் செய்யு மாந்தரே பயித்திய ரிந்நகர்ச் செவ்வி.	48

	புகழ்வி ரும்பியட் டூட்டுவர் புரண்டநூ லவருக் கிகழ்வ ரேழையை யிரங்கியோர் சற்றுண வீயார் திகழு ஞானநூல் செப்புவர் திருட்டள வாக அகழ்வ ரேனைய ரருநிதி வைப்பிட மறிந்தே.	49

	பத்தி நூல்வழிப் போக்கர்மேற் படர்ப்பழி கூறிக் கத்து வார்தெருத் தெருத்தொறுங் கத்தபங் கடுப்பக் குத்தி ரத்துவ வேடர்பாற் கூட்டுண்டு களித்து மித்தி ரத்துவம் பூணுவர் கொக்கன விரகால்.	50

	பஞ்ச தந்திரம் பயிலுவர் காமநூல் படிப்பர் தஞ்ச மாக்கிய வுடைமையைத் தமதெனச் சதிப்பர் நஞ்ச மன்னதீ வினையெலா நயந்தனுட் டிப்பர் வஞ்ச மல்குவாய் மொழியினாற் புதைபட மறைப்பார்.	51

	கடனை வாங்கியே மாற்றுவர் சிலர்சிலர் கையிற் கடனை வையெனத் தொண்டையை நெரிப்பர்கைக் கணக்கி கடனை யேற்றிமற் கட்டுவர் சிலர்சிலர் கடுகிக் கடனை யன்றியோர் காசிலை யெனப்பொருள் கரப்பார்.	52

	கொண்ட பெண்டிரா லூதியங் கொண்டுயிர் கொளுவி உண்டு தேக்கெறிந் துழலுவார் பாழ்வயி றோம்பி மண்டு காமவெம் பிணியினால் வரன்முறை மயங்கி எண்ட காப்பழி பூணுவ ரிகபர மிழந்தே.	53

	அன்ன சத்திரத் துண்டுதேக் கெறிபவ ரனந்தந் துன்னு காமசத் திரந்தொறுந் துதைபவ ரனந்தம் மன்னு செல்வர்தம் மனைக்கடை வறியவ ரனந்தம் இன்ன லுற்றுளங் கசந்தழு மேழைக ளனந்தம்.	54