3. உமறு நன்னெறி உணர்ந்த படலம்

இசுலாம் நெறி வளர்ந்தது

வானவர் தலைவர் தோன்றி வழங்கிய நபியார் பட்டம்
தீனெனும் இசுலாம் கொள்கை தெரிவிக்கும் கலிமா சட்டம்
ஆனவை அனைத்தும் தந்தே ஆயின ஐந்தாம் ஆண்டே
வானிறை ஆணையாலே வளர்ந்ததாம் இசுலாம் தீனே! 1

இரவில் நபிகள் நாயகம் தொழுதார்

ஒன்றிய உளமும் அன்பை உணர்த்திடும் செயலும் கொண்டு
நன்றியல் இறைவன் தன்னை நாடிய வண்ணம் வாழ்ந்து
நன்றிசொல் கின்ற அண்ணல் நபியவர் தனித்திருந்து
வென்றியை விளைக்குமாறு வேண்டும்ஓர் இராக்காலத்தில்; 2

உமறுவையோ, அபூசகுலையோ மனம் மாற்றுக

“ஆண்டவா! உலகில் நின்றன் அரியதீன் நெறியே வெல்ல
மாண்தனி உமறு தாமோ மற்றவர் அபூச கீலோ
நீண்ட நம் அரும்பணிக்கு நேர்வந்தே உதவச் செய்தல்
வேண்டு” மென்(று) அண்ணல்கோமான் வேண்டினார் விருப்பினாலே! 3

அபூசகுல் நபிகளை மாய்க்க அலைந்தான்

இறைவனை நபிகள் வேண்ட இறைஒளி உலகைத் தூண்டக்
கறைமன அபூசகுல்தான் கத்தியும் கையுமாக
மறைவள மனத்தினாரை மாய்க்கவே வேண்டுமென்று
முறையிட உமறும் மற்ற முதுவீரர் களையும் கூட்டி; 4

“முகம்மதுவை அழிப்போம் வாரீர்” என்றான்

“மக்கமா நகருக் கீடாய் மண்ணிலோர் நகரம் இல்லை
மக்கமா மக்கள் தம்போல் மக்களும் வையத் தில்லை
சிக்கல் இல்லாமல் வாழ்ந்தோம் சிறுமையே செய்வதற்கு
மக்காவில் தோன்றி உள்ளான் மகம்மது பேர் கொண்டானே! 5