இந்திரியங்களைத் தான் இட்ட வழக்கு ஆக்கினான் என்கிறார். இனி, பத்தி முன்னாக உன்னை அனுபவியாநிற்கவும், தடைகளும் நீங்கி எல்லை இல்லாத மகிழ்ச்சியும் பிறக்கும்படி உன்னை என்னுள்ளே வைத்தாய் என்று இனியர் ஆகிறார் எனலுமாம்.

    சிரீதரன் - பெரியபிராட்டியாரைத் திருமார்விலே உடையவன். செய்ய தாமரைக் கண்ணன் -¹‘பிராட்டியைத் திருமார்விலே தரித்துக்கொண்டு இருப்பவரும், எங்கும் நிறைந்தவரும் விசாலமான தாமரை இதழ் போன்ற திருக்கண்களை உடையவரும்’ என்கிறபடியே, நீர் பாய்ந்த பயிர் செவ்வி பெற்று இருக்குமாறு போன்று, பிராட்டி மார்வில் இருக்கையாலே குளிர்ந்த கண்ணழகினையுடையவன். என்று என்று - இப்படி மாறாதே சொல்லி. இராப்பகல் வாய் வெரீஇ - இதற்கு, ‘இவர் பத்தி பரவசர் ஆகையாலே இவருடைய தேக யாத்திரை இருக்கும்படி’ என்று முன்புள்ள முதலிகள் அருளிச்செய்வர். இனி, பட்டர் ‘இராப்பகல் வாய்வெரீஇ’ என்றது முதல் ‘மரீஇய தீவினை மாள’ என்றது முடிய, ²‘ஆடிஆடியில்’ இவர்க்கு ஓடின நிலையினைக் கூறுகின்றது என்றும், ‘இன்பம் வளர’ என்றது, ³‘அந்தாமத்தன்பு’ தொடங்கி, ‘கேசவன் தமர்’ முடிய உண்டான பிரீதியைச் சொல்லுகிறது என்றும் அருளிச்செய்வர்.

    அதாவது, ‘இராப்பகல் வாய் வெரீஇ’ என்றது, ⁴‘இவள் இராப்பகல் வாய் வெரீஇ’ என்றதனை. ‘அலமந்து’ என்றது ⁵‘எங்கும் நாடி நாடி’ என்றதனை. ‘கண்கள் நீர் மல்கி’ என்றது, ⁶‘தனகுவளை ஒண்கண்ண நீர்கொண்டாள்’ என்றதனை. ‘வெவ் வுயிர்த்து’ என்றது, ⁷‘உள்ளம் மலங்க வெவ்வுயிர்க்கும்’ என்றதனை. ‘மரீஇய தீவினை மாள’ என்றது, ஆயிரம் யாண்டு முதலையின் வாயிலே யானை இடர்ப்பட்டது போன்று, ‘ஆடியாடி’ யில் இவர்க்குப் பிறந்த ஆற்றாமையினை. இவர்க்கு இப்படிப்பொருந்தின பிரிவின்

_____________________________________________________________

1. விஷ்ணு தர்மம்.

2. ‘ஆடியாடி’ என்றது, இப்பத்தில் நான்காம் திருப்பதிகம்.

3. ‘அந்தாமத்தன்பு’, இப்பத்தில் ஐந்தாந்திருப்பதிகம்.

4. திருவாய். 2. 4 : 5.

5. திருவாய். 2. 4 : 1.

6. திருவாய். 2. 4 : 5.

7. திருவாய். 2. 4 : 4.