3019.	புண்ணியர் தொழுதெழு பூவ ணத்துறை
	அண்ணலை யடிதொழு தந்தண் காழியுள் நண்ணிய அருமறை ஞானசம் பந்தன் பண்ணிய தமிழ்சொலப் பறையும் பாவமே.     11

     11. பொ-ரை: புண்ணியர்கள் தொழுது போற்றுகின்ற
திருப்பூவணம் என்னும் திருத்தலத்தில் வீற்றிருந்தருளுகின்ற
தலைவரான சிவபெருமானின் திருவடிகளைத் தொழுது போற்றி,
அழகிய, குளிர்ச்சியான சீகாழியில் அவதரித்த அருமறைவல்ல
ஞானசம்பந்தன் அருளிய இத்தமிழ்ப் பாடல்களை ஓதவல்லவர்களின்
பாவம் யாவும் நீங்கும்.

     கு-ரை: பண்ணிய - செய்த; இயற்றிய. “புகழ்கொண்டு மற்றிவர்
செய்யும் உடம்பு” என்பதனாலும்: செய்யுள் என்னும் பெயராலும்
அறிக. பறையும் - வெளிக்கிளம்பி நீங்கும் “பறையும் பாவங்களான”
என்ற சுந்தரமூர்த்தி சுவாமிகள் வாக்கினாலும் அறிக.