3784.	நீலமா மணிநிறத் தரக்கனை
	யிருபது கரத்தொடொல்க வாலினாற் கட்டிய வாலியார்      வழிபட மன்னுகோயில் ஏலமோ டிலையில வங்கமே      யிஞ்சியே மஞ்சளுந்தி ஆலியா வருபுனல் வடகரை      யடைகுரங் காடுதுறையே.              8

     8. பொ-ரை: நீலமணிபோன்ற கருநிற அரக்கனான
இராவணனை, இருபது கரத்தொடும் வாலினாற் இறுகக் கட்டிய
வாலியார் வழிபடப் பெருமைபெற்ற கோயில், ஏலம், பச்சிலை,
இலவங்கம், இஞ்சி, மஞ்சள் இவற்றை உந்தி, ஒலித்து, ஓடிவரும்
காவிரியின் வடகரையிலுள்ள குரங்காடுதுறை என்னும்
திருத்தலமாகும்.

     கு-ரை: ஒல்க - குழைய, “ஒல்கு தீம்பண்டம்” (சீவக
சிந்தாமணி - 62) இராவணனை வாலினாற் கட்டிய வாலியார். இலை
- பச்சிலை மரம். குறிப்பு:- எட்டாவது பாடல் மண்ணின் மிசை
வாழ்வார்கள், பிழைத்தாலும் வந்தடையிற் கண்ணுதலோன் தன்
கருணைக் கைக்கொள்ளும் எனக் காட்டவருவது. இப்பதிகத்து
வாலியின் பெருமையோடு படுத்தி இராவணனைக் கூறியமை
பாராட்டத்தக்கது. வாலியார்:- ஒருவரைக் கூறும் பன்மைக்கிளவி.
(தொல். சொல். சூ-27)