மூலம்   பாடல் எண் :1486 நன்று நாடொறும் நம்வினை போயறும் என்று மின்பந் தழைக்கவி ருக்கலாம் சென்று நீர்திரு வேட்களத் துள்ளுறை துன்று பொற்சடை யானைத் தொழுமினே. 1 பொ-ரை: திருவேட்களத்துள்ளுறைகின்ற நெருங்கிய பொலிவார்ந்த சடையுடைய ஈசனைத் தொழுவீர்களாக; அங்ஙனம் தொழுதால் நாள்தொறும் நம்வினை பெரிதும் தொலையும்; என்றும் இன்பம் தழைக்க இருந்து உய்யலாம். கு-ரை: நாடொறும் நன்று - நாள்தொறும் நன்மையே உண்டாகும். என்றும் - எப்பொழுதும். துன்று - நெருங்கிய. பொற்சடை - பொன்போன்ற சடை எனலுமாம். தொழுமின் - வணங்குங்கள்.