(இ-ள்.) மா - ஆர்ப்ப - வண்டுகள் எழுந்து ஆரவாரிக்க;
வரை...........பொங்கிட மலையினின்று அடித்துக்கொண்டுவரும்
புதுப்பூக்களின் தேன் பொங்க; வாவியிற் தர - அங்கங்கே
வாவிகளாலே நிறைந்து நாட்டுக்கு வளம் தருதற்பொருட்டு;
காவிரி........ஓங்குமால் - காவிரியின் நீர் கால்வாய்களிற் பரந்து
எங்கும் ஓடும்.

     (வி-ரை.) மா இரைத்து எழுந்து ஆர்ப்ப - வண்டுகள்
இரைத்து எழுந்து ஆரவாரிக்க; மிகுந்த ஆரவாரத்துடன் எழுந்து
பாடவும், ஆர்ப்ப என்பதற்கு ஆர்த்து மிக ஒலித்து - என
உரைத்தலுமாம். இப்பொருளில் விரித்த என்ற வினைகொண்டு
ஆர்த்து விரித்த பூ - என்க.

     பூ விரித்த புதுமதுப் பொங்கிட - பூ விரித்ததனால்
வெளிப்பட்ட தேன் பொங்க அதனாற் பெருகிய புனல் என்க.
ஆர்ப்ப - பொங்கிட - காவிரிப் புனல் நாடு வாவியிற் பொலி
வளந்தரக் - கால்களிற் பரந்து ஓடும் எனக்கூட்டுக. நாட்டின்
வளத்திற்கு வாவியும் - வாவிகளுக்குக் கால்களும் - கால்களுக்குக்
காவிரிப் புனலும் - அதற்கு மதுவும் - அதற்குப் பூவிரிதலும் -
அதற்கு ஆர்த்தலும் - முறை முறையே ஒன்றற்கொன்று முன்
நிகழ்ச்சிகளாகிய காரணங்களாக அணி பெற அமைத்தமை காண்க.

     வரைதருபூ - மலைப்பூக்கள் மிகுதியும் தேன் உடையன. ஆதலின் அத்தேன் பற்றிக் கூறினார். காவிரியாறு மலையினின்றும்
வருதலின் அத்தேனைக் கொண்டு வரும்; காவிரி நீரின் உருசி -
பெருக்கு - குணங்களுக்கு ஒரு வகையாற் காரணங் கற்பித்தவாறு.
காவிரியையும் இதுபோன்ற நன்னதிகளையும் சாக்கடை
வடிகால்களாக ஆக்கிக் கண்டு மகிழும் இந்நாள் மாக்கள் இதனை
எண்ணித் திருந்த ஒழுகுவார்களாயின் நன்மை பெருகும்.

     வாவியிற் பொலி நாடு வளந்தர - சோழ நாட்டிலே
வாவிகள் மிக்கு இருப்பது இந்நாளிலும் கண்கூடாகக் காணத்தக்கது.
ஆனால் இந்நாளில் அவற்றைப் பலவகையினும் சுகக்கேடு
விளைக்கக்கூடிய வழிகளில் உபயோகித்து வருதல் வருந்தத்தக்கது.

     காவிரி நீர் கால்களிற் பரந்து வாவிகளை நிரப்பி நாட்டுக்கு
வளம் செய்யும்; அங்கிருந்து வாவிகளிற்புக்கும், மதகுகளின் வழியே
வயல்களிற் பாய்ந்தும், பயிர்க்கூழ் விளைவித்தல் அடுத்த பாட்டிற்
காண்க.

     மலையிற் றோன்றிய காவிரியாறு சோழ நாட்டிலே
செய்யப்படும் பசு புண்ணியங்களாகிய உலக அறங்கள் முதலாகச்
சிவபுண்ணியங்கள் வரை எல்லாவற்றிற்கும் காரணமாயிருக்கும்
வழியினை உணர்த்தினார்.

     கால்பரந்து - வாய்க்கால்களிற் பரந்து - தனது கால்களினாற்
பரந்து - எனச் சிறு சொற்சிலேடையாதலும் காண்க.

     பூவிரைத்த - என்பதும் பாடம்.   9