இவர்க்கு இனிப் புதல்வர்ப்பேறே அரியது - இது
அந்நாட்டவர் இவர்களைச் சுட்டிக் கூறும் கூற்று. இனி அரியது -
இவர்களது வயது மிக முதிர்ந்த நிலை குறித்தது. புதல்வர்ப்பேறே
- மக்களைப் பெறுதலாகிய செயலே. ஏகாரம் தேற்றம். அரியது -
இன்மை குறித்தது.

     அதன் படு காதல் - அதன் - அதனில். அந்தப்
புதல்வர்ப்பேற்றிலே. படு - உண்டாகிய. படுதல் - உண்டாதல்; "ஈத
லிசைபட வாழ்தல்" என்புழிப்போல. காதல் - ஆசை பலவற்றுள்
ஒருவகை. காதலன் என்பது காதலுக்கிடமாகியவன். மகன் - என்ற
பொருளில் வழங்குதல் காண்க.

     முருகு அலர் அலங்கல் - முருகு - வாசனை. மணம்
விரியும் மாலை. இங்குக் குமாரக் கடவுட்குரிய கடம்பமலர்
மாலையைக் குறித்தது. "இருள்படப் பொதுளிய பராரை மராஅத்,
துருள்பூந் தண்டார் புரளு மார்பினன்" - என இதனை முதலிற்
றேற்றம்பெறத் திருமுருகாற்றுப்படையினுட் கூறியது காண்க.

     செவ்வேல் - செவ்வொளி வீசும் வேலினையேந்திய. வேல் -
முருகப்பெருமானது ஞானசக்தி யென்ப.

     முருகவேள் - முருகு - இளமை. எஞ்ஞான்றும் மாறாத -
அழியாத - இளமையுள்ள வேள். வேள் - விரும்பப்படுபவன். இப்
பெயரானறியப்படும் கரிய வேளாகிய அழகிய மன்மதனுமுளனாதலின்
அவனினின்றும் பிரிந்துணரும் பொருட்டு முருகவேள் - எனப்
பிரிதினியையு நீக்கிய விசேடணந் தந்தோதினார். இவரது இளமையும்
பேரழகும்பற்றி இவர்க்குக் குமரன் - இளையோன் - முருகன் -
குழகன் - முதலியவாக வழங்கும் பெயர்களும் காண்க.