முருந்து - மயிலிறகின் அடி. முருந்து ....... மயிர்க்கயிறு
- மயிலிறகின் அடியும் குன்றிமணிகளும் இடையிடையேவைத்துப்
புரிகொண்ட முறுக்கமைந்த மயிர்க்கயிறு. இவ்வாறு முறுக்கிய
மயிர்க்கயிற்றினைத் தலையில் நெற்றிக்குமேல் திரணைபோல்
அணிதல் வேடர் முதலியோரது வழக்கு. திருஞானசம்பந்த
மூர்த்திகளது திருமணத்தில் திருநெற்றியின்மேல் முத்தினாலமைந்த
திரணை சாத்தினார்கள் என்பதும் காண்க (திருஞான - புரா - 1215).
ஆரச் சாத்தி - பொருந்தி விளக்க முறும்படி நிறையச் சாத்தி.
மின்னில் திகழ்சங்கு - இல் - ஒப்புப் பொருளில் வந்த
ஐந்தாம்வேற்றுமை யுருபு. மின்போலத் திகழ்கின்ற. தோடுபோலச்
செதுக்கப்பட்டு ஒளிவிளங்குதலால் மின்னில் என்றார்.
சங்கினாலியன்றதோட்டினை அணிதல் முன்னாள்வழக்கு.
சிவபெருமான் சங்கக்குழை தரித்துள்ளார் என ஆகமங்கள்பேசும்.
"சங்கக் குழையார் செவியா அழகா" என்ற நம்பிகள் தேவார
முதலியன காண்க

     புடை - இருபுடையிலும். மாமதி - (இரண்டு) முழுமதிகள்.
வரும்பாட்டில் துண்டப்பிறை என்றதனால் இங்கு மாமதி என்றது
முழுமதி குறித்தது. வைக - தங்க. 58