ஆணைநீகழ - பிள்ளையாரது ஆணையாக - கட்டளையாக நிகழும்படி. அடியாரைச் சாரலாகாது என்று திருநீலகண்டத்தின் ஆணையாக நிகழ்வுற. நிகழ் என்றதனால் அன்று மட்டுமன்றி அது முதல் இனி வருங்காலமெல்லாம் என்றதும் குறிப்பு.

     தூய பதிகம் - தூய்மைதரும் பதிகம். தூய்மையாவது பழவினைப் பயனும் பற்றாதபடி செய்யும் நலம்.

     பதி வாழ்பவர்க்கே யன்றி - நாடு அடங்கவும் - அந்நகரத்தில் வாழ்வாரும் நாட்டில் வாழ்வாரும் ஆகிய அனைவரும். அடங்க - முற்றும். நாடு - நாட்டில் வாழ்வார். பதி வாழ்பவர் - அடியவர்களையும் பரிசனங்களையும் உளப்படுத்தி நின்றது.

     அணிய - அணிந்ததனால்; காரணப் பொருளில் வந்த வினையெச்சம். அணியத் தீர்ந்தது என்று கூட்டுக.

     பிள்ளையாரது திருவுள்ளக் குறிப்பினில் ஆணை நிகழ்வதாகலின் இத் திருப்பதிகத்தை நியதியாய் நியமமாய் ஓதுபவர்கள் பிணிமுதலிய துன்பங்களினீங்குதல் இன்றும் நிகழ்வதாகும்.

     (இ-ள்.) அப்பதி....அகன்று - அத்திருப்பதியினிடத்தில் விரும்ப எழுந்தருளியிருந்து பின் சில நாட்களில் அங்கு நீங்கிச் சென்று; துப்பு உறழ்...தொழுதருளி - பவளம்போன்ற சிவந்த சடையினையுடைய இறைவரது இடங்கள் பலவற்றையும் தொழுதருளி; முப்புரி...மார்பர் - மான் தோலுடன் கூடிய முப்புரி நூலினை அணிந்த திருமார்பினையுடைய பிள்ளையார்; முனிரிவரொடும்.....அணைந்தார் - சொல்லுதற்கரிய சிறப்புடைய திருப்பாண்டிக் கொடுமுடியை முனிவர்களுடன் சென்று அணைந்தருளினர்.

     (வி-ரை.) தானம் பலவும் - இவை திருச்செங்கோட்டுக்கும் கொடுமுடிக்கும் இடையில் பொன்னி யிருகரையிலுமுள்ளவை. பழங்கோயில்கள் பலவும் குன்று தோறாடல்களும் உள்ளன.

     முப்புரி நூலுடன் தோல்அணி - உபநயனம் செய்யப் பெற்றுத் "தோலொடு நூல் தாங்கினார்" ஆதல் குறிப்பு; கருமானின்தோல்.

     முனிவர் - உடன் வந்த அந்தணர்கள்; மறை முனிவர்.

     செப்பருஞ்சீர் - தலப்பெருமை குறித்தது. தலவிசேடம் பார்க்க;

     துப்பு உறழ்வேணி - துப்பு - பவளம்; மின்போற் செவ்வொளி வீசும் சடைக்கு ஒப்பு.

     சில நாளில் அங்கு அகன்று - முதலில் தலம் தொழுது கும்பிடுமாதரவுடன் அக் கோநகரில் இனிதமர்ந்தார்; (2224); பின்னர்க் குடபுலத்தில் தானங்கள் கும்பிட்டு மீண்டும் வந்து வைகினார்; (2225); பின்னர் நாட்டிற் பிணி மூளக்கண்டு பதிகம் பாடிப் போக்கியருளிப் பின்னும் சிலநாள்கள் அங்கு வைகினார் என்க. அங்கு - வைகிய அங்கு நின்றும். உருபு தொக்கது.

     பிறவும் தொழுதிறைஞ்சி - என்பதும் பாடம்.