| | மானிட ருய்ய வேண்டி ஆடல் செய்கை - "நின் தயங்கியாடல்" என்ற பதிகப் பொருள். |
| | நினைப்பதே நியமமாகும் - நியமம் - நியதியாகிய கடன்; ஏகாரம் - பிரிநிலை; நீ செய்யும் பேரருளுக்கு அருள்ஆடலை நினைப்பதனைத் தவிர வேறு கைமாறு ஒன்று மின்று என்பது. ஈண்டுச் சமணர் வாதினில் இறைவர் செய்த பேரருளின் திறங்களெல்லாம் உட்கொண்டு கூறியருளினார். நினைப்பதென் னியமமாகும் என்று பாடங்கொள்வாருமுண்டு; "வேயுறு தோளி", "மானினேர்விழி" என்ற பதிகங்களினும், ஏனை, "மந்திரம்", தளிரிள" "வாழ்க" என்றவற்றினும் உன்னையே முன்னிட்டு வைத்ததன்றி என் செயலாகக் கொண்ட தொன்றுமில்லை என்றபடி. |
| | 866 |
| | 2765. (வி-ரை) தென்னவன் பணிந்து நின்று - நின்று - என்றமையால் நிலமிசை வீழ்ந்து பணிந்து எழுந்து என்றுரைக்க. |
| | மன்னனே - தங்கள் பாண்டியமரபின் குல முதல்வர் சோமசுந்தரக் கடவுள் ஆதலின் குலத்தைக் கேடுறாமற் காத்தவர் என்பது குறிப்பு. |
| | மாயையால் மயங்கி - மாயை - வஞ்சனை என்னும் பொருளில் வந்தது. ஆல் - ஏதுப்பொருளில் வரும் ஐந்தனுருபின் பொருளது. |
| | யாதும் - எவ்வளவேனும் - ஒருசிறிதும் என உம்மை - முற்றும்மை. மேல் உன்னையான் என வருதலின், யானும் என்ற பாடம் பிழை. |
| | உறுபிணி - உறு - முன்செய் தீவினைப்பயனால் வந்த தீயசார்பும், அதுகாரணமாக வந்த மயக்கமும், அதுகாரணமாக விளைந்த சுரநோயும் என்றிவ்வாறு பரம்பரையில் வந்துற்ற விளைவெல்லாம் கொள்ள நின்றது. பிணி - சுரநோயினையே யன்றி அதன் காரணமாய் நின்ற எல்லாம் கொள்க. |
| | தீர்த்து ஆட்கொள்ள - ஆளல்லே னென்று வாளாகிடந்த என்னை அந்நிலை நீக்கி ஆளாக ஏன்றுகொள்ளும் பொருட்டு அதற்கு உரிய சாதனமாகிய ஞானகுருவாக; சிவஞானபோதம் எட்டாஞ் சூத்திரத்தின் கருத்து; கொள்ள - கொள்வதற்காக. |
| | இன்னருட் பிள்ளையாரைத் தந்தனை - பிள்ளையாரைத் தந்தமையே தன் இறைவர் தனக்குச் செய்த பேரருள் என்றபடி. இன்னருள் - தனது தீச் செயல்களுக்காக முனிந்து விடாது, அருளினாலே நோய்தந்து, பின்நீக்கி, உபதேசமும்செய்து, நீறளித்து ஆட்கொண்ட அத்துணையும் எல்லாம் அருளே என்பது; கூட்டுவிப்பவன் நீயே என்ற படி. முன் பலமுறையும் என் முன்னோர்களுக்கு இவ்வாறு வந்த இடர்களை நீக்கிய ஆடல்களைப் போல, இன்று இவரைத் தந்து இடர்நீக்கி யாட்கொண்டனை என்பதும் குறிப்பு. இறைவ - எனது தலைவரே. |
| | மாய்கையான் - என்பதும் பாடம். |
| | 867 |
| | இந்த இரண்டு பாட்டுக்களும் தொடர்ந்து ஒருமுடிபு கொண்டன. |
| 2766 | சீருடைப் பிள்ளை யாருஞ் சிறப்புடை யடியா ரோடுங்
காரினிற் பொலிந்த கண்டத் திறைவர்தாள் வணங்கிக் காதல்
ஆரருள் பெற்றுப் போற்றி யங்குநின் றரிது நீங்கி
ஏரியன் மடத்தி னுள்ளா லினிதெழுந் தருளிப் புக்கார். | |
| | 868 |
| | (இ-ள்) சீருடை.....வணங்கி - சீரினையுடைய பிள்ளையாரும் சிறப்புடைய அடியார்களுடனே மேகம்போன்று விளங்கும் கழுத்தையுடைய இறைவரது திருவடிகளை வணங்கி; காதல்...போற்றி - அன்பினால் நிறைந்த திருவருள் பெற்றுத் துதித்து; |