| இழிந்தருளி - அவர் சிவிகை தாங்கச் சிவிகையில் எழுந்தருளியிருத்தல் தகாதாதலின், இழிந்தருளுதல் - பெரியார்முன் சிறியராயடைந்து என்ற குறிப்பும் தருவது. "இழிந்தே" (1662). |
| இவ்வாறு...என்னாம் - செய்தக்கதல்லாத இச்செயலை இவ்வாறு தேவரீர் செய்யின் அதன் பயன் என்னாகி விளைவது என்று பதைத்துக் கூறியது. "செய்தக்க வல்ல செயக் கெடும்" (குறள்) என அச்செயலைக் கொண்டனர் பிள்ளையார். |
| | செவ்வாறு மொழிநாவர் - முன் பாட்டில் உரைத்தவை பார்க்க. |
|
| | "திருஞானசம்பந்தர்க் கெவ்வாறு செயத்தகுவது?" - சிவஞானம் கிட்டப்பெற்ற போது அதனை அடிசார்ந்து வணங்குதலன்றி வேறென்ன செய்தக்கது என்றபடி; அச் செயலினையே "செய்தக்க செய்யாமை யானும் கெடும்" (குறள்) எனக் கொண்டருளினர். ஒரே செயலினை இவ்வாறு வேறு வேறாகக் கொண்டருளியது அவ்வவலரும் தாழ்வெனும் தன்மையோடு சைவமாஞ் சமயஞ் சார்ந்த நிலை குறித்தது. அவ்வவர் கொண்ட நிலையின்படி இருவர் திறனும் முரண்படாமை அறிந்துகொள்க. |
| | இறைஞ்சினார் - அவர் வணங்காமுன் வணங்கினார் (1662). |
| | எதிரே இறைஞ்சுதலும் - என்பதும் பாடம். |
| | 936 |
| 2835 | சூழ்ந்துமிடைந் தருகணையுந் தொண்டரெல்லா மதுகண்டு
தாழ்ந்துநில முறவணங்கி யெழுந்துதலைக் கைகுவித்து
வாழ்ந்துமனக் களிப்பினராய் "மற்றிவரை வணங்கப்பெற்
றாழ்ந்தபிறப் புய்ந்தோ"மென் றண்டமெலா முறவார்த்தார். | |
| | 937 |
| | (இ-ள்.) சூழ்ந்து...அதுகண்டு - சுற்றி நெருங்கிப் பக்கத்தில் அணையும் மெய்த்தொண்டர்களெல்லாம் அதனைக் கண்டு; தாழ்ந்து...களிப்பினராய் - தாழ்ந்து நிலம் பொருந்த வணங்கி எழுந்து கைகளைத் தலையின்மேற் கூப்பி வாழ்வடைந்து மனமகிழ்ச்சியுடையவராகி; மற்றிவரை....ஆர்த்தார் - மற்று இவ்விரு பெருமக்களையும் வணங்கும் பேறு நாம் பெற்றோமாதலின் நாம் ஆழ்ந்திருக்கும் பிறவிக்கடலினின்றும் ஈடேறியுய்யப் பெற்றோம்" என்று கூறி அண்டங்கள் எல்லாம் பொருந்தும்படி ஆரவாரித்தனர். |
| | (வி-ரை.) சூழ்ந்துமிடைந்து அருகணையும் தொண்டர் எலாம் - "நாற்றிசையோர் - சூழ்ந்த நெருக்கினிடை" (2831) என்றபடி கூடியவரும், அரசுகளும் பிள்ளையாரும் இவ்வாறு கூடிய செயலைக் கண்ட திருக்கூட்டத்தினரும். |
| | வணங்கி - இரு பெருமக்களையும் வணங்கி. |
| | வாழ்ந்து - பெருவாழ்வு பெற்று. |
| | ஆழ்ந்த பிறப்பு - தாம் ஆழ்ந்து கிடந்த பிறவி; பிறப்பு - பிறவியினின்றும். |
| | ஆர்த்தல் - மகிழ்ச்சி மிக்கதனால் உய்ந்தோமென்று பலவாறும் ஆரவாரித்தல். |
| | எழுந்துதம - எழுந்தங்கை தலை - என்பனவும் பாடங்கள். |
| | 937 |
| 2836 | திருஞான சம்பந்தர் திருநாவுக் கரசர்தமைப்
பெருகார்வத் தொடுமணைந்து தழீஇக்கொள்ளப் பிள்ளையார்
மருவாரு மலரடிகள் வணங்கியுடன் வந்தணைந்தார்
பொருவாரும் புனற்சடையார் மகிழ்ந்ததிருப் பூந்துருத்தி. | |
| | 938 |