| போக்கும் - வரவும் - போக்கு - பாண்டி நாட்டுக்கு எழுந்தருளிச் செல்லுதல்; வரவு - அங்குநின்று மீண்டருளுதல். போக்கும் வரவும் - போயினநாள்முதல் மீண்ட இந்நாள்வரை நிகழ்ந்த எல்லா நிகழ்ச்சிகளின் தொகுதி. இக்கருத்தே பற்றிப் புகுந்ததெல்லாம் என்றார். புகுந்தது எல்லா(மு)ம் என ஒருமையிற் கூறினார். போக்கு - பரசமய நிராகரிப்பாகிய அழிவும், வரவு - திருநீற்றின் ஆக்கமாகிய பெருக்கமும் என்றும், புகுந்தது எலாம் - இடையே புகுந்த வாத முதலிய நிகழ்ச்சிகளின் தொகுதி என்றும் குறிக்கொள நின்ற திறமும் காண்க. "வாதில் வென்றதுவும்...திருநீறு வளர்த்ததுவும்" (1664) என்றது காண்க. |
| தூக்கின் தமிழ் விரகர் - தூக்கு - செய்யுள். முதன்மைபற்றி முத்தமிழனுள் இயற்றமிழினை விதந்தோதினார். தூக்கு - எடுப்பு - பெருமை என்றலுமாம். இசைப் பொதுமை என்றலுமாம். "இன்னிசையாற் றமிழ்பரப்பும் ஞானசம் பந்தன்" (நம்பி. தேவா). |
|
| | சொல்லிறந்த ஞானமறை தேக்கும் திருவாய் - சொல்லிறந்த ஞானம் - சொல்லுணர்ச்சியைக் கடந்த ஞானம்; மெய்ப்பொருளை அனுபவமாக அறியுஞ் சிவஞானம். "எண்ணரிய சிவஞானத் தின்னமுதம்" (1965); ஞானமறை தேக்குதல் - ஞானத்தைப் புலப்படுத்தும் சொல் நிறைதல்; தேக்குதல் - நிரம்பி மேல் வருதல்; தேக்கும் - தடையுண்ட நீர் நிரம்பி வழிதல்போல நிரம்பி வருதல் என்ற பொருள் தரும் குறிப்புருவகம். |
| | நூக்கினால் - தேக்கும் என்று கூட்டியுரைக்கவும் நின்றது. |
| | சொல்லிறந்த ஞான மறை தேக்கும் திருவாயால் செப்பி - சொல்லரிய ஞானத்தை மறையினால் வெளியிட வல்லவராதலின் அத்திருவாக்கினால் அது போலவே சொல்லரிய சிவனருட்டுணையாற் பெற்ற அருணிகழ்ச்சிகளைச் சொன்னார் என்பது குறிப்பு. |
| | 941 |
| 2840 | காழியினில் வந்த கவுணியர்தம் போரேற்றை
ஆழிமிசைக் கன்மிதப்பில் வந்தா ரடிவணங்கி
"வாழிதிருத் தொண்டென்னும் வான்பயிர்தா னோங்குதற்குச்
சூழும் பெருவேலி யானீ" ரெனத்தொழுதார். | |
| | 942 |
| | (இ-ள்.) காழியினில்...அடிவணங்கி - சீகாழியில் வந்து அவதரித்த கவுணியர் குலத்தவருடைய போரேறு போன்ற பிள்ளையாரைக் கடலின்மேலே கல்லே மிதவையாகக் கொண்டு வந்தருளிய அரசுகள் அடிபணிந்து; வாழி...எனத் தொழுதார் - வாழ்வு தரும் திருத்தொண்டு என்னும் பெரிய பயிர் ஓங்கி வளர்ந்து பயன்றரச் செய்தற்கு உரியதாகச் சூழும் பெருவேலிபோல நீர் ஆயினீர் என்று கூறித் தொழுதனர். |
| | (வி-ரை.) காழியினில் வந்த - கன்மதிப்பில் வந்தார் -முன் பாட்டில் மன்னர் - வேந்தர் என்று தலைமைபற்றிய ஒப்புமை பெறக் கூறிய ஆசிரியர், இப்பாட்டில் வந்தருளிய தன்மைபற்றிய ஒப்புமைபெறக் கூறிய கவிநலம் கண்டுகொள்க. அரசுகள் வந்த கன்மிதப்புப் போலவே காழியும் தோணியாய் மிதக்கும் தன்மைக் குறிப்புப்படக் கூறியபடியாம். |
| | போரேறு - ஏறுபோல்வாரை ஏறு என்றதுபசாரம்; போரேறு என்ற இத் தன்மையாற் கூறியது வாதஞ் செய்து வென்றருளிய தன்மையும், ஈண்டு அவ்வரலாறுபற்றிக் கூறும் நிலையும் குறித்தற்கு. |