| எல்லாவற்றையும் நீறாக்கும்; அழிதலால் வந்து பொருந்தும்; அப்போதும் அழியாது நிற்கும் தமக்கன்றிப் பிறர்க்கும் ஏலாத; ஆலுதல் - அசைதல்; - (3) ஏடு - இதழ்களை யுடைய; -(4) துவர் - பவள நிறம்; பவளம். புரிசை - மாட உறுப்பு; மதில். கவர - அழிய; பவரும் - விளங்கும் ;-(5) பணி ஆர் - திருப்பணிகள் செய்கின்ற ;- (8) நெடுநீர் - கங்கை. குழல் - ஊதுகுழல்கள் ;-(9) சந்தம் - மணம்; கந்தம் - ஒளி - புகழ் ;-(10) மால் அடிவீழ -நான்முகன் உணர்கில்லா - இருவரும் ஒன்றுபோலவே அடியுமுடியும் அறிகில்லா ராயினும் மால் அறிகில்லேனென்று உணர்ந்து அடிவீழ்ந்தனர்; பிரமன் அங்ஙனமன்றி உணரானாயினும் உணர்ந்தேனென்று பொய் மொழிந்தானென்ற வரலாற்றுக் குறிப்புப்பட அருளியபடி. மால்விடை - திருமாலாகிய விடை;பெரிய விடை. |
|
| | தலவிசேடம் :- திருவடுகூர் - நடுநாட்டில் பாடல் பெற்றனவற்றுள் 16-வது பதி. வடு பூசித்த பதி என்பது தலப் பெயர்க்காரணம்; வடு - வைரவரைக் குறித்தது. இப்போது ஆண்டார் கோயில் என வழங்கப்படும். சுவாமி - வடுகூர்நாதர்; வடுகூரடிகள் என்பது பதிகம். அம்மை - வடுவகிர்க்கண்ணியம்மை; பதிகம் 1. |
| | இது கண்டமங்கலம் என்று வழங்கும் சின்னபாபு சமுத்திரம் நிலையத்தினின்றும் மட்சாலை வழி மேற்கு இரண்டு நாழிகையளவில் அடையத்தக்கது; திருத்துறையூரினின்றும் மட்சாலை வழி வடகிழக்கில் ஒருநாழிகை யளவிலும் அடையலாம். |
| 2862 | வக்க ரைப்பெரு மான்றனை வணங்கியங் கமருநா ளருளாலே
செக்கர் மேனியா ரிரும்பைமா காளமுஞ் சென்றுதாழ்ந் துடன்மீண்டு
மிக்க சீர்வள ரதிகைவீ ரட்டமு மேவுவார் தம்முன்பு
தொக்க மெய்த்திருத் தொண்டர்வந் தெதிர்கொளத் தொழுதெழுந் தணைவுற்றார். | |
| | 964 |
| | (இ-ள்.) வக்கரை....அமருநாள் - திருவக்கரையில் வீற்றிருந்தருளிய இறைவரை வணங்கி அப்பதியினில் விரும்பி எழுந்தருளியிருந்த நாட்களிலே; அருளாலே....மீண்டு - திருவருட் குறிப்பினாலே செவ்வானம் போன்ற சடையினையுடைய இறைவரது திருவிரும்பைமாகாளத்தையும் போய் வணங்கி உடனே திரும்பி; மிக்க.....அணைவுற்றார் - மிகுந்த சிறப்புக்களை வரச் செய்கின்ற திருவதிகை வீரட்டனாத்தைச் சென்று சேர்பவராகிய பிள்ளையார் தம்முன்னர்க் கூடிய உண்மைத் திருத்தொண்டர்கள் வந்து எதிர்கொளத் தொழுது எழுந்து அங்குச் சேரலுற்றனர். |
| | (வி-ரை.) வக்கரை - அமருநாள் - என்றதனால் அப்பதியினிற் சில நாட்கள் தங்கியருளினார்கள் என்பதும். இரும்பைமாகாளமும்....உடன் மீண்டு - என்றதனால் அங்கு வழிபட்டு உடனே மீண்டருளினார் என்பதும் எச்சவும்மையினால் இடையில் திருவரசிலியை வணங்கியதுடன் என்பதும் கருத நின்றன. இவையிரண்டும் தொண்டை நாட்டுப் பதிகள். இவையே தொண்டைநாட்டில் பிள்ளையார் முதலில் "கண்டு போற்றிப் பணிந்த" (2858) பதிகளாம்; ஆனால் இவற்றினின்றும் காஞ்சிபுரம் சென்று சேர்வதற்கு இடையில் திருவதிகை - திருக்கோவலூர் - திருவண்ணாமலை முதலிய பதிகள் உள்ளபடியால் அவற்றை வணங்கிச் சென்றமை மேல் உரைக்கப்படுவது காண்க. "அதிகை வீரட்டமும் மேவுவார்" என்று மேல் தொடங்கிக் கூறுவது மிக் கருத்து. |
| | தொழுதெழுந்து - எதிர்கொண்ட தொண்டர் குழாத்தைத் தொழுது என்றும், வீரட்டமாகிய திருத்தலத்தைத் தூரத்தே தொழுது என்றும் உரைக்க நின்றது. 2405 பார்க்க. |