|
| | இயலுமாறு - பிள்ளையாரது மென்மைக்கேற்குமாறு என்றும், அவ்வவர் திறத்துக் கியன்றவாறு என்றும் உரைக்கநின்றது. |
| | பூவும் பொற்சுண்ணமும் கலந்து வீசுதல் மங்கலம் செய்யும் செயல்களுள் வருவன. "புரிந்த பூவொடு பொற்சுணங்கழுமி" (பெருங்கதை - 2 - 39 - 46). |
| | இருமருங்கும் - தெருவின் இருபக்கங்களினின்றும். |
| | 991 |
| | திருவேகம்ப வழிபாடு |
| 2890 | இன்ன வண்ண மியாவரு மின்ப மெய்த வெய்துவார்
பின்னு வார்ச டைமுடிப் பிரான்ம கிழ்ந்த கோயில்கள்
முன்னு றப்ப ணிந்துபோய் மொய்வ ரைத் திருமகள்
மன்னு பூச னைமகிழ்ந்த மன்னர் கோயின் முன்னினார். | |
| | 992 |
| | (இ-ள்) இன்னவண்ணம்....எய்துவார் - மேற்கூறியவாறு இப்படி எல்லாரும் இன்பம் அடையச் சேர்வாராகிய பிள்ளையார்; பின்னுவார்.... போய் - புரிந்த நீண்ட சடைமுடியினை உடைய இறைவர் மகிழ்ந்த பல கோயில்களைச் செல்லும் வழி இடையே முன்னாகப் பணிந்து சென்று; வரைத் திருமகள்...முன்னினார் - மலையரசன் திருமகளாராகிய உமையம்மையாரது நிலைபெற்ற பூசனையை என்றும் மகிழ்ந்து கொண்டு எழுந்தருளிய திருவேகம்பராகிய இறைவருடைய திருக்கோயிலின் முன் அணைந்தருளினர். |
| | (வி-ரை) இன்ன வண்ணம் - முன் ஆறு திருப்பாட்டுக்களிற் கூறியபடி (2884 - 2889); யாவரும் - காஞ்சிவாணரும் திருத்தொண்டர்களும். |
| | இன்பமெய்த - "வாழ்த்துவதும் வானவர்க டாம்வாழ்வான்"(திருவா) என்றபடி பிள்ளையாருக்கு மங்கலஞ் செய்து எதிர்கொண்ட சிறப்பினால் அவ்வவர்கள் தாங்களின்பமடைய. |
| | எய்துவார் - எய்துவாராகிய பிள்ளையார்; எய்துவார் - போய் - முன்னினார் என்று கூட்டுக. |
| | கோயில்கள் முன்னுறப் பணிந்து போய் - காஞ்சிமாநக ரெல்லையுள் எண்ணில்லாத (கோடி) சிவாலயங்கள் உள்ளன என்பது முன் உரைக்கப்பட்டது; "இறைவர் தாமகிழ்ந் தருளிய பதிகளெண் ணிறந்தவத் திருநக ரெல்லை"(1153) என்றதும், ஆண்டுரைத்தவையும் பார்க்க. இங்குக் கூறிய கோயில்கள் நகரத் தென்மதிற்புறத்தினின்றும் உள்ளே ஏகம்பர் திருக்கோயிலை நோக்கி வரும் வழியினிடையே உள்ளவை; இவை கச்சபேசம் முதலாயின என்பது கருதப்படும். |
| | முன்னுறப் பணிந்து - போய் - திருவேகம்பத்தை நோக்கி வரும் பிள்ளையார் இடையிற் கண்ட இறைவரது கோயில்களையும் வணங்கிச் செல்லவேண்டியது முறையாதலின் அதன்படி முன்னாக அவற்றை இறைஞ்சி. |
| | மொய்வரைத் திருமகள் மன்னுபூசனை மகிழ்ந்த - மலையரசன் மகளாராய் உமையம்மையார் போந்து வந்து காஞ்சி மாவடியில் இறைவரை நிலைபெறப் பூசித்து அறம் வளர்த்து வீற்றிருக்கும் வரலாறு முன் திருக்குறிப்புத் தொண்ட நாயனார் புராணத்துள் விரித்தவாறு காண்க (1127 - 1148); மொய்வரைத் திருமகள் - வரை - மலையரசனைக் குறித்தது; வரை அரசனை வரை என்றதுபசாரம். "பொருப்பில் வேந்தன்"(1131); மன்னு பூசனை - "மாறிலாதவிப் பூசனை யென்றுமன்ன வெம்பிரான் |