| | மற்ற இன்னருட் பிள்ளையார் இவர் திருமேனி எளியர் போலும் = இனிய அருள் வன்மையுடையர் ஆயினும் திருமேனி இளையராதலின் எளியர்போலும் என்றபடி. |
| | போலும் - அருளின் வலிமையால் மேனியும் எளியரல்லாதிருத்தலும் கூடும் என்ற ஐயப்பாடு குறித்தது. |
| | மற்று இவர் - அதுவரை மன்னனுக்கு மற்றவராய் நின்று இப்போது மன்னனுக்கும் தமக்கும் அணியராயினார் என்ற குறிப்புப்படப் பிள்ளையாரை இவர் என்றார். |
| | உவர் எண்ணிலார்கள் - உவர் - உகரச்சுட்டுச் சேய்மைக்கும் அணிமைக்கும் இடைப்பட்ட நிலை குறிக்குமென்ப; ஈண்டு அமணர்கள் அப்போது அரசனுக்கு முற்றும் சேயாருமல்லராய், முற்றும் அணியாரு மல்லராய் நின்ற நிலை குறித்தது. எண்ணிலார்கள் - அரசனது நலமேயன்றித் தந்நலத்தினையும் தாம் கொளுவிய தீயினை ஏவல் கொண்ட பிள்ளையாரது வெற்றிப்பாட்டினையும் எண்ணாதார் என்ற குறிப்புமாம். "அறந்துறந்து தமக்குறுதி யறியாத புல்லறிவோர்" (1360) என்ற கருத்துக் காண்க; உவர் - உவர்த்தலுக்கு - வெறுத்து ஒதுக்குதற்கு - உரியார்கள் என்ற குறிப்புப் படக் கூறியதுமாம். |
| | எங்கள் வள்ளலார் நின்மயக்கம் தீர நல்கும் என்க. எங்கள் - அருமைப்பாடு குறித்த பன்மை; தம்மையும் அமைச்சரையும் உளப்படுத்தி முன் நிகழ்ச்சிக் குறிப்புப் பெற வந்த உளப்பாட்டுத் தன்மைப் பன்மை என்றலுமாம்; மயக்கம் - பொருளல்லவற்றைப் பொருளென்றுணர்ந்த மருளினாற் போந்த விளைவு; மயக்கம் அதன் விளைவாகிய நோய் முதலிய தீமைகளின் தொகுதிக்காயிற்று; மயக்கம் - "கருத்தொழிந்துரைமறந்"(2611) திருந்தநிலை சிறிதளவில் நீங்கியும் முற்று நீங்காத மயக்க நிலை. |
| | பின்னை - முன்னே மயக்கம்தீர அவர் நல்கும், அதன் பின்னே; நல்கும் - உறதி குறித்தது. |
| | மூள்வார் - பொறாமையும் சினமும் மூளப்பெற்றோர்; வல்லரேல் - வல்லரல்லா தொழிகுவர் என்பது குறிப்பு. பேச - பேசுக; அகரம் வியங்கோள் விகுதி. |
| | 758 |
| 2657 | மாறனு மவரை நோக்கி "வருந்தனீ!" யென்று, "மற்று
வேறுவா தென்கொ? லென்மேல் வெப்பொழித் தருகர் நீரும்
ஆறணி சடையி னாருக் கன்பரா மிவரு நீங்கள்
தேறிய தெய்வத் தன்மை யென்னிடைத் தெரிப்பீ" ரென்றான். | |
| | 759 |
| | (இ-ள்) மாறனும்...என்று - பாண்டியனும் மங்கையர்க்கரசி யம்மையாரை நோக்கி "நீ வருந்த வேண்டா" என்று சொல்லி; மாற்று......என்கொல் - பிற வேறு வாது என்ன வேண்டும்; ஆரகர் நீரும்......இவரும் - அருகர்களாகிய நீங்களும் கங்கையைத் தரித்த சடையினையுடையாருக்கு அன்பராகிய இவரும்; என்மேல் வெப்பு ஒழித்து - என்மேல் உள்ள இந்த வெப்புநோயை ஒழியச் செய்து; நீங்கள்..... என்றான் - நீங்கள் அவ்வவர் தெளிந்த தெய்வங்களின் உண்மைத் தன்மையை என்னிடத்தில் விளக்குவீராக என்று சொன்னான். |
| | (வி-ரை) மாறனும்....என்றான் - "மன்ன!"(2656) என்று அரசன் என்னும் நிலையில் வைத்து அம்மையார் அஞ்சிக் கூறி முறைப்பாடு செய்து, மிகைபட நிகழ்ந்த அமணர்களது செயலை ஒழுங்குபடுத்த வேண்டினா ராதலின் அந்நிலையினை மேற்கொண்டே அரசன் முறைப்படுத்தி ஒழுங்கு செய்த நிலை கூறப்பட்டது. மாறன் - இதுவரை பற்றி நின்ற அமணர் சார்பினின்றும் மாறிச் சைவ நெறியில் வரவுள்ளவன் என்றதும் குறிப்பு. |