கொங்கினிற் பொன்னித் தென்கரை கறையூர்க்
கொடுமுடிக் கோயின்முன் குறுகிச்
சங்கவெண் குழைய ருழைவலஞ் செய்து
சாரந்தடி யன்பினிற் றாழ்ந்து
பொங்கிய வேட்கை பெருகிடத் தொழுது,
புனிதர்பொன் மேனியை நோக்கி
"இங்கிவர் தம்மை மறக்கவொண் ணா"தென்
றெழுந்தமெய்க் குறிப்பினி லெடுப்ப, | | 86 | (இ-ள்.) கொங்கினில்....குறுகி - கொங்குநாட்டிலே காவிரியின் தென்கரையில் உள்ள கறையூர்ப் பாண்டிக்கொடுமுடித் திருக்கோயிலின் முன்னே சேர்ந்து; சங்கவெண்...தொழுது - சங்கினா லியன்ற குழையினை அணிந்த இறைவரைத் திருக்கோயிலினைச் சூழ்ந்து வலஞ்செய்து சார்ந்து திருவடிகளில் அன்பினாலே வணங்கி மேன்மேலும் பொங்கிய ஆசை மேலும் பெருகத் தொழுது; புனிதர் பொன்மேனியை நோக்கி - இறைவரது பொன்னார்ந்த திருமேனியைநோக்கி; இங்கிவர்....எடுப்ப - "இங்குள்ள இவரை மறக்கவொண்ணாது" என்று திருவுள்ளத்தில் எழுந்த மெய்க் குறிப்பினாலே தொடங்க,
(வி-ரை.) கொங்கு - கொங்கு நாடு. முன் பாட்டினும் "கொங்கில்" (3239) என்றார்; இதுவரை காவிரி வடகரையிலும் இரு கரைகளிலுமாகச் சோழநாட்டில் யாத்திரை செய்தருளிய நம்பிகள், இங்குக் காவிரி - வடகரை தாண்டி வடகரைப் பதிகளில் (63-வதாக) இறுதிக்கண்ணின்ற திருவீங்கோய் மலையினை வணங்கிச் சோணாடு நீங்கிக் கொங்கு நாடாகிய வேற்று நாட்டுக்குள் யாத்திரை சென்றருளும் நிலை குறித்தற்கு.
கறையூர்க் கொடுமுடிக் கோயில் - "கறையூரிற் பாண்டிக் கொடுமுடி" என்பது பதிகம். ஒரு பாண்டியனது கறைநோய் தீர்த்த காரணத்தால் இப்பெயர் பெற்றதென்பது தலவரலாறுகளுள் ஒன்று. கொடுமுடி - இறைவர் பெயர். மேருவின் பெருஞ் சிகரங்களுள் ஒன்றென்பது வரலாறு; அதனை இடமாகக் கொண்டு இறைவர் விளங்க வீற்றிருத்தலின் கொடுமுடிநாதர் என்றே பெயர் வழங்குவர். கொடுமுடியின் கோயில் என்க. (2236 பார்க்க.) குழையர் உழை - குழையாருடைய கோயிலின் பக்கத்துச் சுற்றி வலமாக.
பொங்கிய வேட்கை பெருகிட - முன்னமே உள்ளடங்காமல் மேலெழுந்து பொங்கிய பெருவிருப்பம் மேலும் பெருக.
பொன்மேனி - பொன்னார்ந்த அழகுடைய திருமேனி. "பொன்னார் மேனியனே" (தேவா). அடியிணையினில் - என்பதும் பாடம்.
இங்கிவர்....எடுப்ப - இங்கு இறைவரது திருமேனிப் பொலிவினில் ஈடுண்டு உள்ளூர அழுந்திவிட்டமையால் இனி இவரை எப்போதும் மறக்கவொண்ணாது என்று திருவுளத்தில் மெய்க்குறிப்பு நிகழ, அதனாலே அக்கருத்துத் தோன்ற; மெய்க்குறிப்பு - உண்மை; சத்தாகிய குறிப்பு. மெய் - திருமேனி என்றலுமாம். |
|
|