|
| | "பெருநாதச் சிலம்பணிசே வடிவருந்தப் பெரும்பகற்கண்
உருநாடி யெழுந்தருளிற் றென்பொருட்டா" மெனவுருகி, | |
| | 181 |
| | வேறு |
| 3336 | "முதுவா யோரி" யென்றெடுத்து முதல்வ னார்தம் பெருங்கருணை
"யதுவா மிது"வென் றதிசயம்வந் தெய்தக் கண்ணீர் மறையருவிப்
புதுவார் புனலின் மயிர்ப்புளகம் புதையப் பதிகம் போற்றிசைத்து
மதுவா ரிதழி முடியாரைப் பாடி மகிழ்ந்து வணங்கினார். | |
| | 182 |
| | 3335. (இ-ள்.) திருநாவலூராளி....மதித்தே - சிவயோகியாராய் மறையவர் வேடங் கொண்டுவந்த இறைவர் மறைந்து நீங்கத் திருநாவலூர்த் தலைவராகிய நம்பிகள் முன்வந்த புகழுடைய மறையவனார் இறையவனாரேயாவர் என்று துணிந்து; பெருநாதச் சேவடி...உருகி - பெரிய நாதமுடைய சிலம்பினை அணிந்த செம்மையாகிய திருவடியிணை வருந்த உச்சிப்போதில் உருவு தாங்கி என்பொருட்டாக எழுந்தருளி நடந்து எழுந்தருளிற்றே! என்று மனமுருகி, |
| | 181 |
| | 3336. (இ-ள்.) முதுவாயோரி...இதுவென்று - முதுவாய் ஓரி என்று தொடங்கி, இறைவனாரது பெருங் கருணைத் திறம் அதுவேயாகும் இச்செயல் என்ற கருத்துடன்; அதிசயம் ...போற்றிசைத்து - அதிசயம் பொருந்தக்கண்ணீர் மழை யருவிபோலப் பெருக, வார்ந்த அப்புதுப் புனலில் திருமேனி முழுதும் மயிர்க்கூச்சினாலே மூடத், திருப்பதிகம் பரவித் துதித்து; மதுவார்...வணங்கினார் - தேன் பொருந்திய கொன்றை சூடிய முடியினையுடைய சிவபெருமானைப்பாடி மகிழ்ச்சி பொருந்த வணங்கினார். |
| | 182 |
| | இந்த இரண்டு பாட்டுக்களும் தொடர்ந்து ஒருமுடிபு கொண்டன. |
| | 3335. (வி-ரை.) சிவயோகியார் - மறையவராய் வந்த சிவபெருமான்; யோகம் - கூடுதல்; சிவயோகியார் - அந்தணர் வேடத்துடன் கூடியசிவபெருமான். |
| | நாமம் - புகழ்; நாமமறையவனார் - பெயர் மாத்திரையால் மறையவரெனப் பட்டார் என்ற குறிப்புமாம். |
| | மதித்தே - கண்ட செயல்களால் காணாத சிவனைத் துணிந்தே; மதித்தல் - காரணங்களால் பொருணிச்சயம் செய்தல். |
| | பெருநாதச் சிலம்பு - நாதம் - சுத்த மாயையாகிய குடிலை; பெருமையாவது மறை முதலிய எல்லாவற்றுக்கும் காரணமாயிருத்தல்; இச்சிலம்பொலிவழியே சென்றால் சிவனை அடையலாம் என்று "திருச்சிலம் போசை ஒலிவழி யேசென்று, நிருத்தனைக் கும்பிடென் றுந்தீபற" என ஞானசாத்திரம் முழக்குதல் காண்க. திருச்சிலம்போசை கேட்கப் பெற்றதனாலே கழறிற்றறிவார் நாயனார் இறைவரது திருவருள் கூடிய துணிபிணைத் தினமும் பெற்றுவந்த வரலாறும் கருதுக. |
| | பெருநாத...பொருட்டாம் - "கழலுஞ் சிலம்புங் கலிக்கப் பலிக்கென், றுச்சம் போதா லூரூர் திரியக் கண்டா லடியா ருருகாரே" என்ற பதிகக்கருத்து; ஈண்டுப் "பெருநாதச் சிலம்பணி சேவடி" என்று நாதச் சிலம்பு பற்றிக்கூறியது, "இவர் இறைவர் தாமே" என்று காணத் துணையாயிருந்தமை குறிப்பா லுணர்த்தற் கென்க. |
| | பெரும் பகல் - நண்பகல்; "உச்சம் போதால்" பதிகம் |
| | உருநாடி - "ஒருநாம மோருருவ மொன்றுமில்லா"த இறைவர் மறையவராகிய ஓர் உருவத்தை மேற்கொண்டு; அகண்டிதமாகியவர் கண்டிதப்படக் காணப்பட்டு. |