|
| | இப்புவிமேல் மகிழ்ந்திருந்து - தாம் முன் இருந்த திருக்கயிலையில் இருத்தலுமின்றி, மேற்குறித்துப் போந்த பொதிகையிற் சேர்தலுமின்றி, இடைவழியில் இங்குத் தங்க நேரிடினும், திருவருள் கைவந்த வழியே இருந்தாராதலின் மகிழ்ந்து என்றார். |
| | திருவருளால் - திருக்கயிலை தன்னில் அணைந்து - தாம் குறித்துப் போந்தபடி பொதிகையில் செல்லாது என்க. அதற்குக் காரணம் திருவருள் ஆணை தந்து செலுத்திய தென்றார். |
| | ஒருகாலும் பிரியாமை தாள் அடைந்தார் - முன்னர்ப் பிரிந்து போந்தமை போல இனி எக்காலமும் பிரியாதபடி என்க. தாள் அடைதல் - சிவசாயுச்சியத்துட் கலந்திருத்தல்; முன் இருந்தநிலை சிவயோக நிலை என்க. |
| | 27 |
| 3591 | நலஞ்சிறந்த ஞானயோ கக்கிரியா சரியையெலாம்
மலர்ந்தமொழித் திருமூல தேவர்மலர்க் கழல்வணங்கி
அலர்ந்தபுகழ்த் திருவாரூ ரமணர்கலக் கங்கண்ட
தலங்குலவு விறற்றண்டி யடிகடிறஞ் சாற்றுவாம். | |
| | 28 |
| | (இ-ள்) நலஞ்சிறந்த....கழல்வணங்கி - நன்மை தருதலிற் சிறந்து விளங்கும் ஞானம் யோகம் கிரியை சரியை என்ற நான்கு நெறிகளும் விரிந்த மொழியினை யுடைய திருமூல தேவரது மலர்போன்ற திருக்கழல்களை வணங்கி (அதனாற் பெற்ற திருவருளின் துணைகொண்டு); அலர்ந்த ...கண்ட - திசைகளில் எங்கும் விரிந்து பரவிய புகழினையுடைய திருவாரூரிலே அமணர்களது கீழாயின செயல்கள் கலங்குதலைச் செய்த; தலங்குலவு...... சாற்றுவாம் - உலகில் விளங்கும் வலிமை பொருந்திய தண்டியடிகளது அடிமைத் திறத்தினை எடுத்துச் சொல்லப் புகுகின்றோம். |
| | (வி-ரை) இது கவிக்கூற்று. ஆசிரியர் தமது நியமப்படி இதுவரை கூறிப்போந்த சரிதத்தை முடித்துக்காட்டி மேல்வரும் சரிதத்துக்குத் தோற்றுவாய் செய்தருளுகின்றார். |
| | நலஞ்சிறந்த......மலர்ந்த மொழி - இது இதுவரை கூறிப்போந்த சரித உள்ளுறையும் சரித சாரமுமாகும். |
| | நலஞ்சிறந்த - வீடு பேற்றுக்கு நெறிகளாகிய. |
| | திருமூல தேவர் - நாயனாரது பெயர்; இவ்வாறு சில பிரதிகளில் இப்புராணப் பெயர் எழுதப்பட்டுள்ளது. |
| | கழல் - "கள்ளவினை, வென்று பிறப்பறுக்கச் சாத்தியவீ ரக்கழலும்" (போற்றிப் பஃறொடை) என்ற கருத்து. "பிறவிவிடர் தீர்ந்துலகத் தோருய்ய, ஞான முத னான்குமலர் நற்றிருமந் திரமாலை" (3589) என்றபடி, பிறவியறுக்க வழி தேடித் தந்த வெற்றிக் குறிப்புப்படக் கழல் என்றார்; அணிமாதி சித்திகளும் யோகநிலையும் கூடிக், காலத்தையும் வெற்றிகொண்ட பண்பும் குறிப்பு. |
| | அலர்ந்த புகழ்த் திருவாரூர் - இறைவர் ஆட்சிபுரிந் தமர்ந்தருளும் புகழ். |
| | அமணர் கலக்கங் கண்ட - விறல் தண்டியடிகள் சரிதத் தோற்றுவாயும் உள்ளுறையுமாம்; சரித சாரம்; அமணர் கலக்கமாவது - ஆரூரில் அமணர்களது நிலைபேற்றினைக் கலங்கச் செய்து அப்புறப்படுத்தியது. கண்ட - காணுதல் - செய்தல்; "முதல்வன் கண்டது முதனூலாகும்." |