முகப்பு

தொடக்கம்

[வார்கொண்ட வனமுலையாள் சருக்கம்] 35. சிறப்புலி நாயனார் புராணமும் உரையும் 581 சிறப்புடைத் திருச்செங் காட்டங் குடியினிற் செம்மை வாய்த்த விறற்சிறுத் தொண்டர் செய்த திருத்தொழில் விளம்ப லுற்றேன். 9 (இ-ள்) அறத்தினின்....வாழ்த்தி - சிவதருமங்களால் மிகுந்த மேன்மை பெற்ற அந்தணர்கள் வாழும் திருவாக்கூரில் வந்த வேதியராகிய பெருவள்ளலார் வண்மையுடைய சிறப்புலியாரை வாழ்த்தி; சிறப்புடை....விளம்பலுற்றேன்- (அத்துணை கொண்டு) சிறப்பினையுடைய திருச்செங்காட்டங்குடியிலே செம்மைநலம் பொருந்திய விறலினையுடைய சிறுத்தொண்ட நாயனார் செய்த திருத்தொழிலினைச் சொல்லப் புகுகின்றேன். (வி-ரை) இது கவிக்கூற்று. ஆசிரியர் தம் மரபின்படி, இதுவரை கூறி வந்த சரிதத்தை வடித்தெடுத்து முடித்துக்காட்டி இனி வரும் சரிதத்துக்குத் தோற்றுவாய் செய்கின்றார். அறம் - சிவதருமம். வைதிக தருமமுமாம். மேன்மை அந்தணர் ஆக்கூர் - மேன்மையுடைய அந்தணர்கள் வாழும் திருஆக்கூர். ஆளுடைய பிள்ளையார் திருவாக்கிற்பட்ட மேன்மை குறித்துத் தொடங்கியவாறே முடித்தபடி; மீண்டும் குறிப்பிட்டது அச் சிறப்பினை மறவாது உட்கொண்டு நினைவு கூர்தற்பொருட்டு. வள்ளலார் - தொகைநூற் கருத்தினை வற்புறுத்தி மனங்கொள வைத்தார். வள்ளலார் வண்சிறப்புலியார் - வள்ளலார் என்றது பண்பினையும், வண்மை என்றது செயலினையும் குறித்தன; வள்ளற் றஞ்செயல் வாய்ப்ப - என முன்கூறியது காண்க; இஃது இச் சரிதச் சிறப்பாகிய பகுதி என அறிவித்தவாறு. வள்ளலார் என்றது புகழ்தரும் ஈகைத்திறத்தினையும், வண்மை என்றது அடியார்களைப் பேணிய நிலையினையுங் குறித்தன என்றலுமாம். சிறப்புடை - பழஞ் சரிதத் தொடர்பாகிய சிறப்பு. செம்மை வாய்த்த விறல் - செம்மை - "தெள்ளிவடித் தறிந்தபொருள் சிவன் கழலிற் செறிவென்றே....அன்பு பள்ளமடை யாயென்றும் பயின்றுவரும் பண்பு" உடைமை (3663); விறல் - அப்பண்பில் ஒழுகும் ஆற்றல்; செவ்விய நெறியின் படைத் தொழில் விறலுமாம். (3666) திருத்தொழில் - திரு - இவர் செய்த செயலின் பேரருமைப்பாடு குறித்த அடை மொழி. 6 சரிதச் சுருக்கம்: - காவிரிபாயும் சோழநாட்டிலே சிறந்த பதி திருஆக்கூர் என்பது; அப்பதி, ஆளுடைய பிள்ளையார் திருவாக்கினால் ஈகைத் திறம் பற்றிப் பாராட்டப் பெற்ற சிறப்புடைய அந்தணர்கள் வாழும் பெருமையுடையது. அதில் வேதியர்குலத்து வந்தவர் சிறப்புலிநாயனார். அவர் ஈகையினாற் புகழ்பெற்று விளங்கியதனோடு அடியார்க்களிக்கும் சிவபெருமான் திருத்தொண்டிலும் சிறந்து விளங்கினார். சிவன் அடியார்களை விதிப்படி வழிபட்டு அமுதூட்டி அவர்கட்கு வேண்டுவன நல்கி வந்தார்; திருவைந்தெழுத்தினை ஓதி முத்தீ வேட்டனர்; சிவ நல்வேள்விகளைச் செய்தனர்; உலகில் வள்ளற்றன்மை பொருந்த நிதிமழை மாரிபோல அத்திறத்தினின் மேம்பட்டு நிகழ்ந்தனர். இவ்வாறு புகழும் சிறப்பும் பொருந்தப் பணிசெய்து சிவனடி சார்ந்து நிலைபெற்றனர்.

மேல்