|
| | |
| | 3718. (இ-ள்) பள்ளியினில்.....தழுவ - பள்ளியில் போய்ச் சேர்தலும் பாதத்தில் அணிந்த சதங்கை மணிகள் சத்திக்கப் பிள்ளை அவர் எதிரே ஓடி வந்து தழுவிக்கொள்ள; எடுத்து....புகுத - அவரை எடுத்துத் தோளில் மேல் வைத்துப் பொருந்தும்படி அணைத்துக்கொண்டு மீண்டு வந்து தமது திருமனையினுள்ளே (நாயனார்) புகுதவும்; குலமாதர்......வாங்கி - குலமாதராகிய திருவெண்காட்டு நங்கையார் வள்ளலார் சிறுத்தொண்டரின் முன்பு சென்று அம்மைந்தன் றன்னை எதிரில்தாம் வாங்கிக்கொண்டு, |
| | 59 |
| | 3719. (இ-ள்) குஞ்சி....ஒதுக்கி - தலைமயிரினைத் திருத்தி, முகத்தைத் துடைத்து, கொட்டையிலும் அரைஞாணிலும் படிந்த துகளை நீக்கி; அணிந்த கலவைச் சாந்தம் அழிந்ததற்கு வருந்தி, கண்ணில் அணிந்த மையினையும் கண்ணிற் படாமல் ஒழுங்காகப் பக்கத்தில் நிற்கும்படி ஒதுக்கி; பஞ்சி......அடியார் - பஞ்சும் அஞ்சத்தக்க மென்மையுடைய அடியினையுடைய அம்மையார்; பரிந்து ......எடுத்து - அன்புடனே திருமஞ்சனம் ஆட்டுவித்துக் குறைதவில்லாத கோலத்தினைச் செய்து எடுத்து; கணவர் கைக்கொடுத்தார் - கணவராகிய நாயனார்கையிலே கொடுத்தனர், |
| | 60 |
| | இந்த இரண்டு பாட்டுக்களும் தொடர்ந்து ஒரு முடிபு கொண்டன. |
| | 3718. (வி-ரை) பாத....தழுவ - ஓடிவந்து தழுவுதல் - இது, வேற்றிடங்களில் தாய் தந்தையர் வரக் கண்டபோது சிறுவர் செய்யும் செயல்; தன்மையணி; பாதச் சலங்கை மணி ஒலிப்ப - ஓடி வருதலால் சலங்கை மணிகள் ஒலித்தன; பாதம் - இங்குச் சரிதப் போக்கிலே ஆசிரியர் அத்திருப்பாதங்களைப் போற்றி வணங்கிக்கொள்ளும் உட்குறிப்பும் கண்டுகொள்க; இது தெய்வக் கவிநயம்; வேறு நிலைகளாற் கூறாது இதுபற்றிக் கூறியது மிக்கருத்து; இவ்வாறு இங்கு ஓடிவந்து தழுவியதுடன் முடிந்த இவ்வோட்டமே, பின்னர்த் திருவருளால் மீள உயிர்பெற்றபோது "பள்ளியினின் றோடி வருவான் போல்வந்த" (3741) ஓட்டமாகத் தொடர்ந்து வரும் தன்மையும் உட்குறிப்பினா லுணர்த்தியவாறும் கண்டு கொள்க. |
| | பியல் - தோள்; தோளின்மேல் வைத்து அணைத்துக்கொண்டு மீண்டது திருவமுதாக்குதற்குக் காலம் தாழ்த்தாது விரைந்துகொண்டு சேறும் பொருட்டாம்; அன்றியும் அடியவரது திரு அமுதுக்குரிய பண்டமாதலின் அவ்வுடல் நடந்து வரச் செய்து வருந்தின் உடல் நைந்து தன்மை மாறுமாதலின் அதன் பொருட்டுமாம். "அத்தர் பியன்மே லிருந்து" (தே - பிள்) |
| | குலமாதர் - குலநயம் பெரிதும் படைத்த அம்மையார்; குலம் - இல்வாழ்க்கைக்குரிய குணநலங்களும் குறித்தது. |
| | வள்ளலார் - செயற்கரிய செய்து வரையாது கொடுக்கும் இத்தன்மை குறிக்க இங்கு இப்பெயராற் கூறினார். |
| | முன் சென்று எதிர் வாங்கி - முன் செல்லுதல் - அம்மையாரின் ஆர்வ மிகுதியும் மேலும் காலந்தாழ்த்தலைத் தவிர்க்கும் கருத்துமாம். "முன் வந்து" (3712) என்றவிடத் துரைத்தவை பார்க்க. |
| | எதிர் வாங்குதல் - அவர் தருதற்கு முன் தாமே வாங்குதல் குறித்ததும் அக்கருத்து. |
| | 59 |
| | 3719. (வி-ரை) அடியார், திருத்துதல் முதலியவற்றைச் செய்து, எடுத்துக் கணவர் கையிற் கொடுத்தார் என்று கூட்டி முடிக்க. |