|
| | |
| | பொருளினை - என்பதும் பாடம். தாருகன் வதமும், காமனை எரித்ததும் குறிக்கப்பட்டன. கரும்புனை - மிகப் பசிய புன்னை மரங்கள். புன்னை - புனை என வந்தது இடைக்குறை; புனை...காட்டும் - தன்மை யணியினை உள்ளுறுத்த உருவகம். முத்து - முத்துப்போன்ற மொட்டு; பொன் - தாது; பவளம். பூவின் உள்ளிருக்கும் செவ்விய இளங்கொட்டை; "பொன்னவிழ்ப்பனமலர்ப் புன்னை" (1113);-(10) முன்னாள் - அயன் - வழிபாடு செய்ய இருந்த - தலவரலாறு குறித்தது; கண் - கணுக்கள்;- (11) காமரம் - சீகா மரப்பண். நிறைநீர் - முன் கூறியவை எல்லாம் நீர்ச் சிறப்புப் பற்றியன என்று முடித்துக் காட்டியவாறு. இச்சிறப்பு வெள்ளக் காலத்தில் இன்றும் காணவுள்ளது; நண்பு - சிவன் பாலன்பு என்ற பொருளில் நின்றது; சிவனே எஞ்ஞான்றும் உயிர்களுக்கு நண்பு செய்து எடுப்பவன் என்றறிந்து, என்றும் ஏனை நட்புக்கள் எல்லாம் அழியத் தக்கன என்பதும் கண்டு என்றும் அந்நண்பினையே பிடித்து அவ்வழிபாட்டிற் சிறந்த என்க. "மாதொரு பாகனார்க்கு..மேம்படு சடையனார்" (149); நண்புடைய என்றதனை இசை ஞானி ஆரூரன் என்பவற்றுடனும் கூட்டுக. இங்கு நம்பிகள் தமது தந்தை, தாய், வயது (சிறுவன்), ஊர், பேர், பண்பு முதலிய எல்லாம் ஒருசேரப் பெறவைத்த சிறப்புக் காண்க. பண்பயிலும் - இறைவனது பண்பும் அவன் வெளிப்பட இருக்கும் பதியின் பண்பும் பலவாறு பயிலக்காட்டும். |
| | தலவிசேடம் :- திருக்கலயநல்லூர் - காவிரித் தென்கரை 68-வது பதி; இப்போது சாக்கோட்டை என வழங்கப்படுகின்றது; உயிர்களை அடைத்த கலயம் (கும்பம் - குடம்) நீர்ப் பெருக்கு ஊழியில் தங்கிய இடமாதலின் இப்பெயர் பெற்ற தென்பர்; நீர்வளமுள்ள அரிசிலாற்றின் தென்கரையில் உள்ள தென்பது பலபடியாலும் பதிகத்துப் பாராட்டப்பட்ட பெருமையுடையது; பதிகத்துள் இறைவரது அருளிப்பாடாகிய மெய்ம்மைப் புராணம் பலவும் விரிவாய்ப் பதிகப்பாட்டுக்களிற் போற்றப்பட்ட பெருமையும் மறையவர்கள் வாழும்பதி என்பதும் பதிகத்துப் பாராட்டப்பட்ட பெருமையும் உடையது. சுவாமி - அமிர்தகலாநாதர்; அம்மை - அமிர்தவல்லி - பதிகம்; |
| | இது கும்பகோணம் நிலையத்துக்குத் தெற்கே நீடா மங்கலம் கற்சாலை வழியில் 2 நாழிகையில் அரிசிலாற்றின் தென் கரையில் உள்ளது. |
| | குறிப்பு :- பூசையின் பொருட்டு அரி (விட்டுணு) சொல்லின் வழி வந்தமையால் அரி சொல் ஆறு எனப் பெயர் பெற்றதென்றும் இப்போது மருவி அரிசிலாறு என வழங்குவதென்றும் கூறுப. |
| 3222 | அங்கு நின்று திருக்குடமூக் கணைந்து பணிந்து பாடிப்போய்,
மங்கை பாகர் வலஞ்சுழியை மருவிப் பெருகு மன்புருகத்
தங்குகாத லுடன்வணங்கித் தமிழாற் பரசி, யரசினுக்குத்
திங்கண் முடியா ரடியளித்த திருநல் லூரைச் சென்றணைந்தார். | |
| | 68 |
| | (இ-ள்.) அங்கு...போய் - அப்பதியினின்றும் திருக்குட முக்கினை அணைந்து வணங்கித் திருப்பதிகம் பாடிச் சென்று; மங்கை...பரசி உமைபாகராகிய இறைவரது திருவலஞ் சுழியினைச் சார்ந்து, பெருகும் அன்பு உள்ளத்தினை உருகச் செய்ய நிரம்பிய பெரு விருப்பத்துடன் வணங்கித் தமிழ்ப் பதிகத்தினாலே போற்றி செய்து; அரசினுக்கு...சென்றணைந்தார் - மதியினைச் சடையில் அணிந்த பெருமானார் திருநாவுக்கரசருக்குத் திருவடியினைத் சூட்டியருளிய திருநல்லூரினைச் சென்று சேர்ந்தருளினர். |