சங்கரனுக் காளான தவங்காட்டித் தாமதனாற்
பங்கமறப் பயன்றுய்ப்பார்; படிவிளக்கும் பெருமையினார்;
அங்கணனைத் திருவாரூ ராள்வானை யடிவணங்கிப்
பொங்கியெழுஞ் சித்தமுடன் பத்தராய்ப் போற்றுவார். | | 8 | (இ-ள்) சங்கரனுக்கு.....பயன்றுய்ப்பார் - சிவபெருமானுக்கே ஆளாகிய தவத்தினை மேற்கொண்டு உலகு விளக்கித் தாம் அதனால் குற்றமறப் பயன் பெறுவர்; படிவிளக்கும் பெருமையினார் - உலகினை விளங்கச் செய்யும் பெருமையினை உடையவர்கள்; அங்கணனை...போற்றுவார் - அங்கணராகிய சிவபெருமானைத் திருவாரூரினை ஆளும் இறைவரைத் திருவடிகளில் வணங்கி மேன்மேல் எழுகின்ற சித்தத்துடனே பத்தராய்ப் போற்றுபவர்கள்.
(வி-ரை) துய்ப்பாரும் பெருமையினாரு மாவார்கள் பத்தராய்ப் பணிவார்கள் என்று இயைக்க; பெயர்ப்பயனிலை.
தவம்காட்டி - தவம் - சிவவேடமும் சிவபூசையும்; காட்டுதல் - இவையுடைமையினால் உள்ளே நிகழும் அன்பினை அறியச் செய்தல்.
தாம் - தாமும் என எச்ச உம்மை விரிக்க; உலகறியவைத்த பயன்றருதலேயன்றித் தாமும் அத்தவத்தால் வரும்பயனை அனுபவிப்பர். உலகறியத் தவவேடம் பூணலேயன்றிக் தாம் அதன் பயன் துய்யாதாரும் உளராதலின் அவரினின்றும் வேறுபிரித்துணரத் தாமும் அதனாற் பயன்றுய்ப்பார் என்றார்; முத்தநாதன், அதிசூரன் முதலாகவந்த தருதவவேடத்தாரையும். வயிற்றுப்பிழைப்புக்காகத் தாங்கும் தவவேடத்தாரையும் நீக்குதலின் பிறிதினியைபு நீக்கிய விசேடணம்; பங்கமற - என்ற குறிப்புமது. பயன் - சாதனமுறையாலே தவத்தால் வரும் பயன்.
படி - உலகு; உலகருக்கு; இடவாகு பெயர்; படிவிளக்கும் - உலகை விளங்கச் செய்யும்; விளக்குதல் - எடுத்துக்காட்டாக நிற்றலால் அறிவுறுத்துதல்; நடந்து (ஒழுகிக்) காட்டுதல்; படி - இதன்படி என்ற மேற்கோள்நிலை (Example - உதாரணம்) என்றுரைக்கவும் நின்றது; பத்தர் குணங்கள் எட்டின் நிலை.
அங்கணனைத் திருவாரூ ராள்வானை - “அரசினையாரூ ரமரர் பிரானை அடிபணிந்திட்டுÓ (திருவந் - 70) என்ற வகைநூற் கருத்தினை விரித்தவாறு.
படிவிளக்கும் பெருமையினார் “உரை செய்த....அங்கத்தினோர்Ó (திருவந். 70) என்ற வகைநூற்கருத்தினைக் காட்டியவாறு.
பொங்கி எழும் சித்தம் - மேன்மேல் அன்புபொங்கி எழும் உறைப்பாகிய சித்தம்.
பயன்றுய்யார் என்ற பாடம் தவறு. |
|
|