அழகிய பெரிய கையைப் பிடித்து, கொழுநருடன் போவாரும் - அவருடன்
நடந்து செல்வாரும்.

     நெறிக்கொள்வாரும் செல்வாரும் ஊர்வாரும் போவாரும் ஆகிய
படையன்ன மகளிரும் எனவருஞ் செய்யுளோடு இயைக்க. (24)

     (இ - ள்.) சுரும்பு கமழ்தேம் கண்ணி - வண்டு மொய்த்த
மணங்கமழும் தேன் நிறைந்த மாலையையணிந்த, பைங்கழல் தொடு
ஆடவரும் - பசிய வீரக்கழல் அணிந்த ஆடவர்களும், கருப்புச்சிலை
மன்னவன் - கரும்பு வில்லையுடைய மன்மதனது, நால் கருவிப்படை
அன்னவரும் - நான்கு வகைப்பட்ட படைகளைப்போன் மகளிரும்,
விருப்புற்று - விரும்பி, எறிநீர் வையை - எற்றுகின்ற நீர் நிறைந்த
வையையாறு, தரளம் தெள்ளி வெள்ளைப் பொருப்பில் குவிக்கும் -
முத்துக்களைக் கொழித்து வெள்ளைமலைபோலக் குவிக்கின்ற, புளினம்
புறம் சூழ் சோலை புகுவர் - மணற்குன்றுகள் புறஞ்சூழ்ந்த சோலைகளிற்
புகுவாராயினர்.

     சுரும்பு, கரும்பு என்பன வலித்தல் பெற்றன; கருவிப்படை,
கருவியாகிய படை; இருபெயரொட்டு. (25)

     (இ - ள்.) கூந்தல் பிடியும் பரியும் ஊர்வார் - புறமயிரையுடைய
பெண் யானைகளிலும் குதிரைகளிலும் ஏறிச்சென்ற மகளிர், கொழுநர்
தடம்தோள் ஏந்த - தத்தம் கொழுநர்கள் பெரியதோளால் ஏந்த, சயமாது
என்னத் தழுவா இழிந்து - வெற்றிமகளைப் போலத் தழுவி இறங்கி,
பொழில்வாய் - சோலையினிடத்து, பூந்தொத்து அலர் பொற்கொடி தாது
உகுமாறு என்ன - பூங்கொத்துக்கள் அலர்ந்த பொன்போன்ற
கொடியினின்றும் மகரந்தஞ் சிந்துதல்போல, புனைந்த சாந்தக் கலவை உக
- அணிந்த கலவைச்சந்தனம் உலர்ந்து சிந்த, போய் - சென்று,
வனமங்கையர்போல் சார்ந்தார் - வனத்தில் வாழுந் தெய்வமகளிரைப் போல
அடைந்தனர்.

     கொழுநரின் தோளைத் தழுவினமையால் அத்தோள்மீது இருக்கும்
விசய இலக்குமிபோல் விளங்கின ரென்க. ஊர்வார் தழுவா இழிந்து
உகப்போய்ச் சார்ந்தார் என வினைமுடிக்க. (26)