தெளித்து அங்ஙனம் தெளித்தலாற் கழுவி என்க. இருட் பாச மையல் மாசு
எனக் கூட்டி, ஆணவமாகிய மயக்கத்தைச் செய்யும் அழுக்கினை
என்றுரைத்தலுமாம். (23)

     (இ - ள்.) நகை மலர் இட்டு அருச்சித்து - விளக்கமாகிய மலர்களால்
அருச்சித்து, நல்ல பரிகலம் திருத்தி - நல்ல உண்கலத்தைத்திருத்தி வைத்து,
நறுவீ முல்லை முகைஅனைய பால் அடிசில் வெள்ளி மலை என -
நறுமணங்கமழும் மலர்களையுடைய முல்லையின் அரும்பு போன்ற பால்
வார்த்துச் சமைத்த சோற்றை வெள்ளிமலை போலவும், பருப்பு முதுகில்
செம்பொன் சிகரம் என - பருப்பினை அம்மலையின் முதுகில் உள்ள சிவந்த
பொன்னாலாகிய முடிபோலவும், பல்வேறு கருனை - பலவேறு
பொரிக்கறிகளை, புறம் தழீஇக் கிடந்த ஈட்டம் சிறு குன்றின் வகை என -
அம்மலையின் புறத்திற் சூழ்ந்து கிடந்த கூட்டமாகிய சிறு மலைகளின் வபை
போலவும், நெய் அருவி எனப் படைத்து - நெய்யினை (அம்மலையில்
ஒழுகும்) அருவி போலவும் படைத்து, சிற்றுண்டி வகையும் அனைய பெய்து
- வேறு வேறு சிற்றுண்டிகளையும் அங்ஙனமே படைத்து.

     பரிகலம் - உண்கலம், திருத்தி - தூய்மையுற வைத்து, நறுவீ,
முல்லைக்கு அடை. பாலடிசில் - வெள்ளிய அடிசிலுமாம். அடிசிலின்
மேலிட்ட பருப்பு வெள்ளி மலையின் பொன் முடிபோலவும், அடிசிலைச்
சூழவிட்ட கருனைகள் வெள்ளி மலையைச் சூழ்ந்து கிடந்த குன்றுகள்
போலவும், அடிசிலின்மேலிருந்து ஒழுகம் நெய் வெள்ளி மலையின்
முடியிலிருந்து ஒழுகும் அருவி போலவும் இருக்குமாறு என்க; வடிவும்
நிறமும் பற்றி உவமைகள் கூறினார். (24)