காலினும், பல்லினும் என்பவற்றில் இன் உருபு உறழ்ச்சிப் பொருளில்
வந்தது. மேலினும், இன் ; சாரியை. வென்கண்டு என்ற மையால் போர்
புரிந்து என விரித்துக் கொள்க. பால் - தன்மை. வென்றியால் வீக்கிய
எனலுமாம். ஆயினர் என விரித்துரைத்துக் கொள்க. (12)

     (இ - ள்.) எண் புதைத்து எழுந்த - இங்ஙனம் எண்ணின் அளவைக்
கடந்து எழுந்த, வீரர் இவுளி தேர்யானை வெள்ளம் - வீரர் குதிரை தேர்
யானை என்பவற்றின் கூட்டங்கள்; மண் புதைத்தன - நிலவுலகை மறைத்தன;
பதாகை மாலை வெண் கவிகை பீலி - கொடிகளும் மாலையையுடைய
வெளிளய குடைகளும் மயிற் பீலிகளும், விண் புதைத்தன - வானினை
மறைத்தன; நுண் தூளி வெயில் விடு பரிதிப்புத்தேள் கண் புதைத்தன -
நுண்ணிய புழுதிகள் வெயிலை வீசும் சூரிய தேவனின் கண்களை மறைத்தன;
பேர் - ஓதை கடல் ஒலி புதைத்தது - (இவற்றாலாய) பெரிய ஒலியானது
கடலின் ஒலியை மறைத்தது எ - று.

     எண் புதைத்து எண்ணினை மறைத்து; இல்லையாக்கி; கடந்தென்ற படி.
வெள்ளம் என்பது வீரர் முதலியவற்றொடும் இயையும், பதாகை -
பெருங்கொடி, அன்று, ஏ : அசைகள்; அடுத்த செய்யுளுக்குங் கொள்க. (13)

     (இ - ள்.) தேர் ஒலி - தேர்களின் ஒலியும், கலினப் பாய்மான் செலவு
ஒலி - கடிவாளத்தையுடைய குதிரைகள் செல்லுகின்ற ஒலியும், கொலை வெள்
கோட்டு கார் ஒலி - கொல்லுதலையுடைய வெள்ளிய கொம்புகளையுடைய
முகில் போன்ற யானைகளின் ஒலியும், வீரர் ஆர்க்கும் கனை ஒலி -
மள்ளர்கள் ஒலிக்கின்ற மிக்க ஒலியும், தார்புனை குஞ்சி - மாலையை யணிந்த சிகையையும். வார் ஒலி கழல் கால் - மிக்க ஒலியையுடைய வீரகண்டையை
யணிந்த கால்களையும், செங்கண் - சிவந்த கண்களையுமுடைய, மள்ளர் -
வீரர்கள், வல் திண் தோள் கொட்டும் பேர் ஒலி -வலிமை மிக்க
தோள்களைத் தட்டுகின்ற பெரிய ஒலியும் ஆகிய இவைகள், அண்டம்
பிளந்திடப் பெருத்த - அண்டங்கள் வெடிக்குமாறு மிக்கன எ - று.

     (பா - ம்.) * பாய்மா.