(இ - ள்) சிலம்பி வாயின் நூல் இழைத்திடு பந்தரில் - சிலந்திப்
பூச்சியானது வாயின் நூலாற் செய்த பந்தரின்கண், செங்கண்மால்
தொழவைகும் - சிவந்த கண்களையுடைய திருமால் வணங்க வீற்றிருக்கும்,
அலம்பு தெண் திரைப் பொன்னி அம்தண்துறை ஆனைக்கா இறைக்கு -
ஒலிக்கின்ற தெள்ளிய அலைகளையுடைய காவிரியாற்றின் அழகிய தண்ணிய
நீர்த்துறையையுடைய திருவானைக்காவுடைய செல்வருக்கு, அன்புகலந்த
சிந்தையான் - அன்பு கலந்த உள்ளமுடையவனும், மூவிருபத்து
நால்கலைகளும் பயின்று உள்ளம் மலர்ந்தவன் - அறுபத்து நான்கு
கலைகளையும் கற்று அறிவு விரிந்தவனும் ஆகி, கரிகால் பெரு வளத்தவன்
- கரிகாற்பெருவளத்தா னென்னும் சோழமன்னன், வையகம் புரக்கின்றான் -
நிலவுலகை ஆண்டு வருவானாயினான்.

     ஆனைக்கா - யானை பூசித்த காவாகிய பதி. யானை பூசித்ததும்,
சிலம்பி வாயினூலாற் பந்தரிட்டு வழிபட்டதுமாகிய வரலாறுகளைப்
பெரியபுராணத்திலுள்ள கோச்செங்கட் சோழர் புராணத்தாலறிக. கரிகாற்
பெருவளத்தான் உருவப்பஃறேர் இளஞ்சேட் சென்னியின் புதல்வன்; போர்
குறித்து வடதிசைச் சென்று, அமயமலை குறுக்கிட்ட தென்று சினந்து
அதனைச் செண்டாடித்த பெருவீரன்; காடுகெடுத்து நாடாக்கியும்,
காவிரிக்குக் கரையிடுவித்தும், நீர் நிலைகளைப் பெருக்கியும் நாட்டினை
வளஞ்செய்வித்தவன்; பொருநராற்றுப்படை, பட்டினப்பாலை முதலிய
பாட்டுகட்குத் தலைவன்; பட்டினப்பாலை பாடிய உருத்திரங்கண்ணனார்
என்ற புலவர்க்குப் பதினாறு நூறாயிரம் பொன் பரிசில் கொடுத்தவன்;
மற்றும் இவன் பெருமைகளைப் பட்டினப்பாலை முதலியவற்றா னறிக. (4)