இவன் தான் இந்திர சாலம் காட்டும் சித்தனோ என்பார் - (அன்றி) இவன்
இந்திரசாலங் காட்டுகின்ற சித்தனோ வென்று செப்புவர்; ஆர் என்றும்
தெளியோம் என்பார் - இவருள் யாரென்றுந் தெரிந்திலோம் என்று கூறுவர்.

     தான் நான்கும் அசை. பேய்கோட்பட்ட, தம்மினாகிய தொழிற்சொல்
வர வலிஇயல்பாயிற்று. அலைப்பான், வினையெச்சம். எத்தன் -
ஏமாற்றுவோன். (43)

     (இ - ள்.) பாடல் விஞ்சையனோ என்பார் - பாடலில் வல்ல
கந்தருவனோ வென்று பகருவார்; பண்ணினால் பாணிக்கு ஏற ஆடல்
விஞ்சையனோ என்பார் - பண்ணோடு தாளத்துக்குப் பொருந்த ஆடுதலில்
வல்ல பரதநூற் புலவனோ வென்று அறைகுவார்; அரும் பெறல் செல்வத்து
ஆழ்ந்து - (முன்னே) பெறுதற்கரிய செல்வப் பெருக்கில் அழுந்தி,
வாடியமகனோ என்பார் - (பின்) அச்செல்வங் குன்றிய மகனோ வென்று
செப்புவார்; இசைபட வாழ்ந்து கெட்ட ஏடு அவிழ் தாரினாருள் -
புகழுண்டாக வாழ்ந்து பின் அவ்வாழ்க்கை கெட்ட இதழ்விரிந்த மாலையை
யணிந்த மன்னருள், இவன் யார் மகன்கொல் என்பார் - இவன் யார்
மகனோ என்று சொல்லுவார்.

     ஆல் ஒடுவின் பொருட்டு. பாணி - தாளம். ஏற - பொருந்த. கெட்ட
என்னும் பெயரெச்சம் தாரினார் என்பதன் விகுதியோடியையும். இவன்
யார்மகன் கொல் என மாறுக. (44)

     (இ - ள்.) கரும்பனும் விரும்பநின்ற கட்டழகு உடையன் என்பார் -
மதவேளும் விரும்புமாறு நின்ற பேரழகுடையனென்று பேசுவார்;
அரும்பெறல் இவன் தான் - பெறுதற்கரிய இவன், கூலிக்கு ஆட்செய்தது
எவனோ என்பார் - கூலியின் பொருட்டு ஆளாக வந்து வேலை செய்தது
யாது காரணமோ என்று கூறுவார்; இரும்பெரும் குரவர் அற்ற
தமியனோவென்று என்பார் - தாயுந் தந்தையுமாகிய இருமுது குரவரும்
இல்லாத தனியனோவென்று சாற்றுவார்; வேலை புரிந்தவன் அல்லன்
என்பார் - இவன் இதற்கு முன் வேலை செய்தவனல்ல னென்று விளம்புவார்;
அது மேனிபுகலும் என்பார் - அதனை இவன் திருமேனியே செப்புகின்றது
எனச் சொல்லுவார்.