முகப்பு

நாலாயிர திவ்ய பிரபந்தம்

இரண்டாம் ஆயிரம் திருமங்கை ஆழ்வார் பெரிய திருமொழி
திருநாங்கூர்த் திருத்தேவனார்தொகை
1247 போது அலர்ந்த பொழில் சோலைப் புறம் எங்கும் பொரு திரைகள் தாது உதிர வந்து அலைக்கும் தட மண்ணித் தென் கரைமேல் மாதவன்-தான் உறையும் இடம் வயல் நாங்கை-வரி வண்டு தேதென என்று இசை பாடும்-திருத்தேவனார்தொகையே             (1)
1248 யாவரும் ஆய் யாவையும் ஆய் எழில் வேதப் பொருள்களும் ஆய் மூவரும் ஆய் முதல் ஆய மூர்த்தி அமர்ந்து உறையும் இடம் மா வரும் திண் படை மன்னை வென்றி கொள்வார் மன்னு நாங்கை- தேவரும் சென்று இறைஞ்சு பொழில்-திருத்தேவனார்தொகையே             (2)
1249 வான் நாடும் மண் நாடும் மற்று உள்ள பல் உயிரும்    தான் ஆய எம் பெருமான் தலைவன் அமர்ந்து உறையும் இடம் ஆனாத பெருஞ் செல்வத்து அரு மறையோர் நாங்கை-தன்னுள்__ தேன் ஆரும் மலர்ப் பொழில் சூழ்-திருத்தேவனார்தொகையே 3
1250 இந்திரனும் இமையவரும் முனிவர்களும் எழில் அமைந்த சந்த மலர்ச் சதுமுகனும் கதிரவனும் சந்திரனும்    எந்தை எமக்கு அருள் என நின்றருளும் இடம் எழில் நாங்கை- சுந்தர நல் பொழில் புடை சூழ்-திருத்தேவனார்தொகையே             (4)
1251 அண்டமும் இவ் அலை கடலும் அவனிகளும் குல வரையும் உண்ட பிரான் உறையும் இடம் ஒளி மணி சந்து அகில் கனகம் தெண் திரைகள் வரத் திரட்டும் திகழ் மண்ணித் தென் கரைமேல் திண் திறலார் பயில்-நாங்கைத் திருத்தேவனார்தொகையே             (5)
1252 ஞாலம் எல்லாம் அமுது செய்து நான்மறையும் தொடராத    பாலகன் ஆய் ஆல் இலையில் பள்ளிகொள்ளும் பரமன் இடம் சாலி வளம் பெருகி வரும் தட மண்ணித் தென் கரைமேல் சேல் உகளும் வயல்-நாங்கைத் திருத்தேவனார்தொகையே             (6)
1253 ஓடாத ஆளரியின் உரு ஆகி இரணியனை      வாடாத வள் உகிரால் பிளந்து அளைந்த மாலது இடம் ஏடு ஏறு பெருஞ் செல்வத்து எழில் மறையோர் நாங்கை-தன்னுள்- சேடு ஏறு பொழில் தழுவு-திருத்தேவனார்தொகையே             (7)
1254 வார் ஆரும் இளங் கொங்கை மைதிலியை மணம் புணர்வான் கார் ஆர் திண் சிலை இறுத்த தனிக் காளை கருதும் இடம் ஏர் ஆரும் பெருஞ் செல்வத்து எழில் மறையோர் நாங்கை-தன்னுள்- சீர் ஆரும் மலர்ப் பொழில் சூழ்-திருத்தேவனார்தொகையே             (8)
1255 கும்பம் மிகு மத யானை பாகனொடும் குலைந்து வீழ    கொம்பு-அதனைப் பறித்து எறிந்த கூத்தன் அமர்ந்து உறையும் இடம் வம்பு அவிழும் செண்பகத்து மணம் கமழும் நாங்கை-தன்னுள்- செம் பொன் மதிள் பொழில் புடைசூழ்-திருத்தேவனார்தொகையே             (9)
1256 கார் ஆர்ந்த திருமேனிக் கண்ணன் அமர்ந்து உறையும் இடம் சீர் ஆர்ந்த பொழில் நாங்கைத் திருத்தேவனார்தொகைமேல் கூர் ஆர்ந்த வேல் கலியன் கூறு தமிழ்ப் பத்தும் வல்லார் ஏர் ஆர்ந்த வைகுந்தத்து இமையவரோடு இருப்பாரே             (10)