மேல் சபையாக வானோர் விருப்பு எழீஇ மருங்கில் சூழ, நூல் சபையாகக் கற்றோர் நுதலிய புகழின் மிக்கோர், கோல் சபையாக மூவர், கொடுந் துயர் குடியாய் வைகும் பேற்சபை என்னும் கானம் பெற்று, உளம் தளரா புக்கார்.

     மேலுகத்துக் குழுவினராகப் பத்தாயிரம் வானவர் இரு பக்கமும்
தம்மைச் சூழ்ந்துவர, நூல் உணர்ந்தோர் அவையில் இடம் பெறத்தக்க
கற்றோர் கருதிய புகழுக்கெல்லாம் மேம்பட்ட வரும், ஆட்சிக்குரிய
குலத்தவருமாகிய இம்மூவரும், கொடிய துன்பங்களெல்லாம் குடிகொண்டு
தங்கும் பேற்சபை என்னும் பாலைவனம் வரப்பெற்று, தம் உள்ளம்
தளராமல் அதனுள் புகுந்தனர்.

     இதுவே அப்பாலைவனமென்று சுட்டிக்காட்டிய விரலையே தீய்க்கவும்,
அதுகேட்டு நோக்கிய கண்ணின் பார்வையைத் தீய்க்கவும், "இப்பெயர்
சூட்டியுள்ள இப்பாலைவனம் சுடும்" என்று ஒருவன் சொன்னால், அவ்வாறு
சொல்லும் வாயையே தீய்க்கவும், அங்கே திரண்டுள்ள நெருப்பை மனத்தால்
எண்ணினால், எண்ணிய அவ்வெண்ணத்தையே தீய்க்கவுமாக, கோணிய
மனம் போலத் தீய்க்கும் கொடியதோர் பாலைவனம் அது.

     'அன்றோ' அசைநிலை. அடுத்து வரும் பாடல்களுக்கும் இது
பொருந்தும்.