ஈறின்றி எழும் - முடிவில்லாது எழுவதாவது ஒரு திருப்பதிகத்தினுள் ஒரு பாசுரம் முடிந்தவுடனே அடுத்த பாடல் தொடர்ந்தும், ஒரு பதிகம் முடிந்த உடனே மற்றொரு பதிகம் தொடர்ந்தும் முன் நினைவிலிருந்து சொல்வதுபோல வெளிவருதல். ¹ இவ்வாறு எப்போதும் பதிகங்கள் பாடியருளிக்கொண்டே யிருந்தனராதலின் நாயனார் 49000 திருப்பதிகங்கள் பாடினர் என்பது வரலாறு. "ஏழெழுநூ றிரும்பனுவ லீன்றவன் றிருநாவினுக் கரசன்" (நம்பிகள் - திரு நின்றியூர்), "பதிகமே ழெழுநூறு பகருமா கவியோகி" (நம்பியாண்டார் நம்பி - திருவேகாதசமாலை) என்பன காண்க. பனுவல் - பாட்டு என்று கொண்டு, இதற்கு 4900 பதிகங்கள் என்பாருமுண்டு.

கையில் திகழும் உழவாரமுடன் - நாயனாரது திருவடையாளப்படை உழகாரமென்பர். "ஏரின் சிவபோக மிங்கிவர்க்கே யென்னவுழ, வாரங்கொள் செங்கையர் தாள் வாரம்வைப்ப தெந்நாளோ" என்று தாயுமானாரும, "உழவாரத்திண் படையறாத் திருக்கரமும்" என்று எமது மாதவச் சிவஞான முனிவரரும் துதித்தனர்.

கைத்தொண்டு - என்றதனால் மெய்யினாற் செய்யும் திருத் தொண்டும், கலந்து - என்றதனால் வாக்கினாற் செய்யும் திருத் தொண்டும், கசிந்தனர் என்றதனால் மனத்தொண்டும் குறிக்கப்பட்டன. கலந்து என்பது வாக்கு முதலிய புறக் கரணங்களின் செயலையும், கசிந்து என்பது மனம் முதலிய உட்கரணங்களின் செயலையும் குறித்தன.

தியான உணர்வு - திருவாசக வாக்கு - உழவாரக்கை - என்பவற்றால் தொண்டு செய்யுங் கருவியும் கரணங்களும் குறிக்கப்பட்டன. தொண்டு - கலந்து - கசிந்தனர் - என்பன அவற்றாற் (எதிர் நிரனிறையாக) செய்த தொண்டினையும், அனுபவப்பயனையும் குறித்தன. இந்நிலையினையே "அருந்தவம்" என்று 1134-ல் விரித்தனார்.

கைக்கொண்டு - என்பதும், கைகொண்டு கசிந்து கலந்தனரே - என்பதும் பாடங்கள்.

77

78

(இ-ள்.) விண்ணோர் தனி நாயகனார் கழலில் - தேவர்க்கெல்லாம் தனி முதல்வராகிய வீரட்டானேசுவரருடைய திருப்பாதங்களில்; மெய்ம்மை......விருப்பதனால் - (மனம் வைத்து) விரும்பி மெய்யினாலும் வாக்காலும் திருப்பணிசெய்து விண்ணப்பித்ததனாலே; தம் இச்சை.....தாபதியார் - தமது இச்சை நிரம்பும்படி வரம்பெற்ற, அந்தத் தெய்வத்தன்மை வாய்ந்த திருவதிகைத் தலத்தின்மேவிய தாபதியாராகிய திலகவதியார்; பொய்ம்மை...விட்டருளி - பொய்ம்மையாகிய சமணசமயத் தொடக்கினை விட்டு, அவர், (தம்பியார்) இறைவன் திருமுன்பு வந்து புகுவதற்கு ஏதுவாகிய சூலைநோயினை ஏவி விடுத்தருளி; பொருளா....பெற்ற