ஆச்சிரமமும், அடிமைக் குலமும் குறித்தது. குலமிலராயினும் - அவ்வாறு நல்ல குலமில்லாரேயாயினும் - (7) தூய்மையுடைய தொண்டர்கள் உலகிறந்த நிலையினில் நின்றனர்; அவர்கள் சிவநெறியினைத் தலைப்பட்டுச் சிவயோகங் கைவரப்பெற்று நின்றமைகண்டு, அவர்களை விரைவில் அணைந்து அந்நன்னெறியினை நானுமடைய எண்ணி அவரது சிவனொளியினின்ற உருவத்தைக் கண்டு அந்நெறியே திருவருளை நாடிநிற்க என்னை அஞ்செழுத்தும் நாடிற்று. "அம்மலங்கழீஇ யன்பரொடு மரீஇ" என்ற சிவஞானபோதம் 12-ம் சூத்திரக் கருத்து - (8) மனைக்கு ஏற்றிடும் விளக்கு அந்த அளவில் வீட்டினுள் உள்ள இருளை வலியிலதாகச் செய்யும்; ஆனால் சொற்றுணையாய இந்த அஞ்செழுத்துச் சுயஞ்சோதியாய்க் கெடாத ஒளியுள்ளது; இனி, மனையினுள் ஏற்றும் பலதிறப்பட்ட ஒளிகளும் பலராலும் காணப்படுவது; ஆனால் அஞ்செழுத்து யாவராலும் காணொணாத வகையில் உள்ளத்தை விளக்கஞ் செய்வது. - (9) முன்னெறியாகிய சிவனது நன்னெறியே யாவருக்கும் புகலிடமாம். சரண் - புகல் இடம் - (10) மாப்பிணை தழுவிய - மாது - பிரிதலில்லாத பெருஞ்சத்தியாய் இறைவனுடன் இருக்கும் அம்மையினை. பிணை - பிணா - பெண். பூப்பிணை - திருந்தடி - அடியார் இட்ட மலர்களால் அழகு படுத்தப்பட்ட திருவடி. பூப்பிணை - மலர்மாலை. பொருந்த - முதற்பாட்டிற் கூறிய கருத்து. நாப்பிணை தழுவிய - நாவினிடத்து இடையறாமல் நவிற்றுதலால் தழும்பேறி அத்தன்மை பதிந்த. நமச்சிவாயப் பத்து - அஞ்செழுத்தின் பதிகம். ஏத்தவல்லார் - எத்துதலின் அருமை குறித்தது. இடுக்கண் இல்லை - பதிகப் பயனும் குறிப்புமாம். நாயனாரது தேவாரப் பதிகங்களுள் பயன் சொல்லிய பதிகம் இஃதொன்றேயாம். சிவனை ஏத்திப் பயனடைதலே மக்கட்கு உறுதியாத லறிவிக்கப் பயன் கூறினார். ஏகாரம் தேற்றம். இல்லை - இல்லையாகும் என ஆக்கச்சொல் வருவித்துக் கொள்க. "ஏத்தவல் லாரெலாம், பந்த பாச மறுக்கவல் லார்களே" என்று பிள்ளையாரும், "சொல்லு வார்க்கில்லை துன்பமே" என்று நம்பிகளும் அவ்வப் பதிகங்களுக்குப் பயன் கூறியருளியவற்றையும் இங்கு நினைவுகூர்க.

127

(இ-ள்.) வெளிப்படை. பெருக்கெடுத்த அன்பின்றிறத்தினராகிப் பிடித்துக் கொண்ட தன்மையினாலே, அரிய பிரமதேவன் முதலாகிய அமரர்களாலும் போற்றற்கரிதாகிய திருவைந்தெழுத்தையும் திருநாவுக்கரசர் இவ்வாறு தோத்திரஞ் செய்யவே, கரிய கடலினுள்ளே கல்லானது மிதந்தது.

(வி-ரை.) பெருகிய அன்பினர் பிடித்த - பெருகுதல் - எஞ்ஞான்றும் சோர்தலில்லாது மிகுதல். அன்பினர் - குறிப்பு வினையாலணையும் பெயர். பிடித்த பெற்றியால் - "அன்பொடுபற்றிய" என்ற முன்பாட்டிற் கூறியகருத்து. பெற்றியால் - போற்றிட.

அமரர் - உயர்வு சிறப்பும்மை தொக்கது. அரு - மலரோன் என்ற அடை கொடுத்துக் கூறியதன் கருத்தும் காண்க.

அமரர் வாழ்த்துதற்கரிய அஞ்செழுத்து - அமரர் சுவர்க்க போக முதலிய பயன் கருதிச் செய்யும் பசுபுண்ணியமே வல்லாராய்ப் புண்ணியபாவங்களினிடைப் பட்டு உழல்பவராயும், அன்பொடு முற்றும்பற்றித் தம்மைமறந்து சிவனையே நினைக்கமாட்டாதவராயும் உள்ளமையால் இங்ஙனம் கூறினார்