1490. (இ-ள்.) மார்பு ஆரப் பொழி கண்ணீர் மழை வாரும் திருவடிவும் - மார்பில் நிறையும்படி பொழிகின்ற கண்ணீர் மழை வார்கின்ற திருவடிவமும்; மதுரவாக்கில் தீந்தமிழின் மாலைகள் சேர்வு ஆகும் திருவாயும் - மதுரவாக்கில் இனிய தமிழ்ப் பதிகங்கள் சேரும் திருவாயும்; செம்பொன் தானே சார்பு ஆன திருமனமும் - இறைவருடைய செவ்விய பொன்னார்ந்த திருவடிகளையே சார்பு கொண்ட திருமனமும்; உழவாரத் தனிப்படையும் - திரு உழவாரமாகிய ஒப்பற்ற படையும்; தாமும் ஆகி - (ஆகிய) இவற்றைக் கொண்டுள்ள தாமும் ஆகிய இவையுமே யாகி; பார் வாழ... செல்வார் - உலகமெல்லாம் வாழும் பொருட்டுத் திருவீதிப் பணிகளைச் செய்து பணிந்து துதித்துப் பரவிச் செல்வாராய்,

225

1491. (இ-ள்.) நீடு ... தம்மை - புகழ்நீடும் திருவாரூரில் மணிப்புற்றினை நிலவும் இடமாகக் கொண்டு எழுந்தருளியிருக்கும் நிருத்தரை; கூடிய ... கும்பிட்டு - பொருந்திய அன்பினோடு ஒவ்வோர் காலங்களிலும் அணைந்து கும்பிட்டு; கோதில் ... பாடி - குற்றமில்லாத வாய்மையுடைய "பாடினம் பூதத்தினான்" என்று தொடங்கும் பதிகத்தினையும், அது முதலாகிய பல பதிகங்களையும் அருளிச் செய்து; நாடிய ... செல்வார் - உள்ளத்தால் நாடிய ஆசைபெருக மனம் நைந்து கரைந்து உருகி நயந்து செல்வாராகி,

226

1492. (இ-ள்.) நான்மறைநூல் ... நிலையால் - நான்கு வேதங்களிலும் ஏனைய ஞான நூல்களிலும் பேசப்படும் பெருமையையுடைய வாய்மையாற் சிறந்த நமிநந்தியடிகளுடைய திருத்தொண்டினது நலத்தின் சிறப்பினாலே; அவரை ... பாடி - பரமேசுவரரையே போற்றுகின்ற திருவிருத்தத் திருப்பதிகத்தினுள் அவரை வைத்துப்பாடி; தேன்மருவும் .. போற்றி - தேன் பொருந்திய கொன்றையினையுடைய சிவபெருமான் திருவாரூர் அரனெறியில் விளங்க வீற்றிரும் சிறப்பினையும் போற்றி; அணிவீதி ... நாளில் - அழகிய திருவீதிப் பணியினையும் செய்து அங்கு விரும்பி எழுந்தருளியிருக்கும் நாளிலே,

227