1

4

திருச்சிற்றம்பலம்

பதிகக் குறிப்பு :- தமது திருவுருவில் ஒருபாதியில் அம்மையாரை வைத்தவர்; காமனுடலட்டார்; திருவடியாற் கூற்றுவனை அட்டார்; ஊழிதோறூழி யுயர்ந்தார்; உலகமெல்லாம் வைப்பார் - களைவார் - வருவிப்பார்; அப்பாலைக் கப்பாலைக் கப்பாலார் என்றிவ்வா றெல்லாம் அறியப்படுகின்ற முழுமுதல்வராகிய இறைவரைத் திருவாரூரில் இருப்பாரைக் கண்டும் அடியேன் அடைய மறந்தவாறு தான் என்னை? "ஆரூரிலம்மான் றன்னை யறியா தடிநாயே னயர்த்த வாறே" என்ற பதிகத்தின் மகுடமும் இக்கருத்துப் பற்றியது.

பதிகப் பாட்டுக் குறிப்பு :- தசமுகன். இராவணன். ஒருகால் - கயிலை மலையை எடுக்க முயன்றபோது. அழுவித்தான் - மலையின் கீழ்ச்சிக்க அழுத்தி அழும்படிச் செய்தமையால் அவனுக்கு அழுகின்றவன் - இராவணன் - என்ற பெயர் போந்தது. சந்திரன் மேனி மறுச் செய்தான் - தக்க யாகத்தில் வீரபத்திரரால் சந்திரனைத் தேய்த்தவன். ஆதித்தன்பல் கொண்டதும் அப்போது. - (2) விளக்கினொளி - மின்னொளி - முத்தின் சோதி - "சோதியே சுடரே சூழொளி விளக்கே" (திருவா.) சத்து - சித்து - ஆனந்தம் என்னும் மூன்றும் நிறைந்த சோமாஸ்கந்த மூர்த்தம். நீரகத்தே அழலானான் - ஒடுக்கும் முறை. ஏழ்கடலையும் சுவறச் செய்யும் தீ, அக்கடலின் அகத்தே தங்கிக் கிடப்பதென்பது வரலாறு. - (3) ஒரு தேவர் - விட்டுணு. ஒரு காலத்து - ஆயிரம் மலரா லருச்சித்தபோது. ஊழி ஆயினானை - காலங் கடந்தவர். என்றும் உள்ளவர். - (4) வெண்பளிங்கி னுட்பதித்த சோதியான் - "பளிங்கிற் பவளம் பதித்தான் பதியே" (திருமந்திரம்). வெண்பளிங்கு - ஆன்மா. அதனுள் தன் தன்மையை வைத்தவன். உயிர்க்குயிராயுள்ளவன். உலகமெல்லாம் வைப்பான் - நிலைபெற வைப்பவன். களைவான் - அழிப்பவன்; வருவிப்பான் - ஒடுங்கின தன்னிடத்திலிருந்து மீள உண்டாக்குபவன். புனருற்பவம் செய்விப்பவன். "ஒடுங்கி மலத்துளதாம் அந்தமாதி" (சிவஞான போதம் 1 - சூத்). - (6) நிலனாகி என்பது முதலியன இறைவன் ஐம்பூதம் முதலிய எல்லாமாயிருக்கும் தன்மை. இவையிற்றின் நியமமாகி - இவற்றை நியமித்து நடத்துபவன். நீதி - செம்மை நெறி. பாதியாய் ஒன்றாகி - "பாதியுமாய் முற்றுமாயினார்க்கு" (திருவா - பொற்சுண்ணம்.) பாதி...முன்றாய் - பெருகு நிலை. பரமாணுவாய் - சிறுகுநிலை. சோதியாயிருளாகி - சோதி - ஒளி; இருள் - ஒளிக்கு மறுதலை.. இவ்விரு பொருள்களுந் தாமச அகங்காரத்தின் தத்துவக்கூறு; தாமசக் கூறுகளிற் றோன்றியன. இவை தங்காரியங்களைச்