திருவொற்றியூர்

திருச்சிற்றம்பலம்

பதிகக் குறிப்பு :- தலைவரைப் பிரிந்த தலைவி பிரிவாற்றாது வருந்தி யிருப்பவள், தலைவரைக் கனவிற் கண்டு மயல்மிக்க நிலையுற்று, விழித்துக், கனவுமிழந்த நிலையில் கூறும அகப்பொருட் டுறையில் அருளப்பட்டது இத்திருப்பதிகம். உயிர் இறைவனிடம் ஈடுபட்டுச் செய்யும் முறைப்பாடு உட்குறிப்பு. 9-வது பாட்டு இறைவர் உலகிறந்து நிற்கு நிலைபற்றி எழுந்தது. கனவிழந்திரங்கல் என்பது நெய்தற்றிணைக்குரிய இரங்கல் என்னும் உரிப் பொருள் பற்றியது.

பதிகப் பாட்டுக் குறிப்பு :- (1) கமலம் - கழுநீர் - மத்தம் - இறைவர் சடையிற் சூடுபவை. தோள்களாயிரம் - இறைவரது எங்கு நிறைந்த திருமேனி. ஆயிரம் - அனேகம். "ஆயிரம் பொன்வரை போலு மாயிரந் தோளுடை யானும்" (ஆரூர் - நேரிசை.) உண்டார்.....வேண்டி - நஞ்சுண்ட கருத்து உலக முறுதி கண்டு உய்யும் பொருட்டு. கண்டேன்.....கைவிட்டவே - கனவிற்கண்ட அகப்பொருள். கடும்பிணி - காமமிக்க நிலை. சுடுந்தொழில் - தலைவரைப் பிரிந்த நிலையில் நிலா முதலிய தண்ணிய பொருள்களும் சுடும் தன்மை பூண்டு உடற்றுதல். இனிக், கனவகத்திலும் நனவிற் போலக் காணும் நிலை கைகூடவே, கடும்பிணி - பிறவி நோயும், சுடும்தொழிலும் - இறந்துபட உடலைச்சுடும் தொழிலும், கைவிட்ட - இல்லையாயின; என்று பிறிதோருண்மைப் பொருளும் காண்க. -(2) பாகமது ஓர் பெண்ணுடையார் ஆயினும் பரமயோகி என்க. காமத்தால்...கண் மூன்றினார் - காமனை முனிந்த செயல்பற்றிக் கூறியது தலைவனைப் பிரிந்தாருக்கு அவனால் வரும் வேதனை நோக்கித் தலைவி எரிந்து கூறியதென்க. "காமனை முன்செற்ற தென்றா ளவளிவள் காலனென்னுந், தாமநன் மார்பனைமுன் செற்ற தென்றுதன் கையெறிந்தாள்" (பொன் - அந் - 45). காமத்தால் - காமன்கொண்ட காமங்காரணமாக. ஓமத்தால் - வேதமந்திர வேள்விகள் செய்யுமாற்றால். -(3) கள்ளம். "உள்ளங்கவர் கள்வன்", "உள்ளத்தை நீர் கொண்டீர்" என்று இக்கருத்தை விளக்கப்பட்டது. -(4) கலங்கள் - மரக்கலங்கள். நாவாய் - கப்பல் என்ப. நின்று தோன்றும் - திருவொற்றியூரின் அணிமையில் கலங்கள் கரைசேருந் துறை அந்நாளிலும்