9

திருச்சிற்றம்பலம்

பதிகக் குறிப்பு :- பொழில்கள் திகழும் திருப்பூவணத்தில் கோயிலினுள் இறைவர் தமது திருவுருவம் நேர் தோன்றக் காட்சியளித் தருளுகின்றார்; அத்தோற்றத்தில், வடிவேலு திரிசூலம், சடைமேல் இளமதியம், கொன்றைக்கண்ணி முதலியன எல்லாம் தோன்றும், ஆணாகிப் பெண்ணாய் வடிவுதோன்றும்; மின்னிடையாள் பாகமும் பன்னிரண்டு கண்ணுடைய பிள்ளையும் தோன்றும்; மயலாகும் தன் அடியார்க்கருளி மறுபிறவி யறுத்தருளும் வகையும், ஆரொருவ ருள்குவா ருள்ளத்துள்ளே அவ்வுருவாய் நிற்கின்ற அருளும் தோன்றும்; வைகைத் திருக்கோட்டினின்ற திறமும் தோன்றும்; சண்டிக்கருளித் தன் முடிமேல் அலர் மாலை அளித்தல் தோன்றும் என்றிவ்வாறு பலவும் அத்திருக்காட்சியைப் பாராட்டிப் போற்றியது.

பதிகப் பாட்டுக் குறிப்பு :- (1) வடிவு - ஒளி; அழகு, "மருள்பொழி மும்மலஞ் சிதைக்கும் வடிச்சூலம் வெயிலெறிப்ப" (சிறுத் - புரா - 35). வடிவு - வடிவம். மூர்த்தம் என்று கொண்டு. இச்சாஞானக்கிரியை - ஆரணி ஜனனி ரோதயித்ரி - அயன் அரி அரன் என்னும் இவர்கள் மூர்த்தமாய் விளங்கும் என்றலுமாம். வடியேறு என்று பாடங்கொண்டு, வடி - கூர்மை என்பாருமுண்டு குழை தோடு கலந்து - இடப்பால் தோடும் வலப்பால் குழையுமாகக்கூடி. கலந்து - வெவ்வேறாகிய ஆண்பெண் வடிவம் ஒன்றாகக் கூடி. இதனையே "ஆணாகிப் பெண்ணாய் வடிவு" (2) என்பார். - (2) ஊண் ஆகி - பலிதேர்வாராகி. குற்றார் - பகைவர்; முப்புரவாணர். - (3) ஐவகையால் நினைவார் - ஐந்து சாதாக்கியங்களாக. சிவனை ஐந்து முகங்களையுடைய சதாசிவ மூர்த்தியாக நினைந்து பூசிப் போர் என்றலுமாம். ஐந்தெழுத்தாகிய மந்திர உருவினராகவும், ஐந்தொழிற் பெருங்கூத்துடையவராகவும் நினைவோர் என்றலும் பொருந்தும். திருவங்க மாலையிற் கூறியவாறு ஐம்பொறிகளாலும் என்றலுமாம். - (4) படை மலிந்த - படைகளுட் சிறந்த. பன்னிரண்டு கண்ணுடைய பிள்ளை - முருகப்பெருமான் இங்கு நாயனார்க்கு எதிர் தோன்றிக் காட்சி தந்தருளிய திருவுருவம், இத்தலத் தெழுந்தருளியுள்ள சோமாஸ்கந்த மூர்த்தம் என்பது குறிப்பு. இங்கு இரசவாதஞ் செய்த திருவிளையாடல் வரலாறும், பொன்னனைய திருமேனி பொலிந்து தோன்றும்" (7) என்னும் குறிப்பும் கருதுக. - (5) மயல் - வேறு ஒன்றும் தோற்