(இ - ள்.) வெடித்து மலராநின்ற தாமரை மலர்ந்து நறுமணமுடைய செங்கழுநீர் மலர்ந்து வண்டுகள் கிண்டுதற்கிடமான குமார தீர்த்தத்திலே மகிழ்ந்து ஆடித் தன்னைக் கண்டோர் பெரிதும் அஞ்சாநிற்பத் திருமலையை வலம் வந்து அதன்மேல் விரைந்து ஏறித் தேவதேவனாகிய முருகவேளின் திருவடிகளை வணங்கி ஆண்டே தங்கிற்று.

(வி - ம்.) விண்டு - வெடித்து. கஞ்சம் - தாமரை. கதழ்ந்து - விரைந்து. அசைந்தன்று - அசைந்தது; தங்கிற்று.

(5)

(இ - ள்.) அற்றைநாள் இவ்வாறு கழிய மறுநாள் அவ்விடத்தினின்றும் போந்து பக்கத்தே அண்மையில் மேற்றிசையிலே பொருந்திய குளிர்ந்த சுனையொன்றனைத் தன்னெதிரே கண்டு அதன்கட் பொருந்தி நீராடி மணங்கமழாநின்ற கடப்பமலர் மாலையணியும் மார்பினையுடைய முருகவேளின் தாமரைமலர் போன்ற திருவடிகளை நன்மையோடு நெஞ்சிலே பதித்து நன்மை தக்குள பெரிய தவத்தை இயற்றியது.

(வி - ம்.) அவண் - அவ்விடத்தே. மார்பன் - முருகன்.

(6)

(இ - ள்.) தவமுயற்சியிலே பல நெடியநாள் சென்ற பின்னர்த் தன்னெஞ்சத்தைத் துயரினின்றும் நீக்குதற் பொருட்டுக் கன்னிமைத் தன்மையுடைய மயிலேறும் பெருமான் முன்சென்று கரியதிண்மை பொருந்திய தன் உடலிற் செதும்பு அகன்று இயங்கவந்தமை கண்டுமகிழ்ந்து பணம் விரித்தாடிப் பெருமானுடைய அழகிய திருவடிகளை வணங்கித் தன்னுடைய புகழ் நிரம்பிய நாகநாட்டினை
எய்தியது.

(வி - ம்.) தீர்ப்பான் - தீர்த்தற்கு. கன்னிமைத்தன்மை - அழிவின்மை. வைப்பு - நாடு.

(7)

(இ - ள்.) வாசுகி ஆடியதனால் நாகசுனை என்று பெயர்பெற்ற அந்தத் தகுதியுடைய தீர்த்தத்தின்கண் சிறந்த ஆதிசேடன் திருமா