(வி-ம்.) ஆண்டு இல் என்பது அந்நங்கையின் தந்தை இல்லின்கண் என்பதுபட நின்றது. அல்குவர்-சேர்வர். தீண்டில் என்பது அறிந்தோ அறியாமலோ தமது அம்பலத்து வந்து எய்தின் என்பதுபட நின்றது. தூண்டில் எடுத்த வரால்-தூண்டிலாற் பற்றி விசைத்தெடுத்த வரால் என்க. தெங்கு-தென்னை. பாண்டில்-கிண்ணம். இது தாமரை மலருக்குவமை. தாமரை: ஆகுபெயர். கீழும்-கிழிக்கும். பழனங்கள்-கழனிகள். பொது நிலங்களுமாகும். தில்லையின்வாய்ப் பழனங்கள் என இயையும். “ஆண்டு இல் எடுத்தவராம் இவர்தாம்” என்று தம்முட் கூறிப் பின் செவிலிக்குக் கூறினாராக உரைக்க. இவ்வாறு கூறாமல் செவிலி கேட்ப முழுவதூஉம் தம்முட் கூறினாராக உரைப்பினும் அமையும். மெய்ப்பாடு-பெருமிதம். பயன்-செவிலிக்கியல்பு கூறி அவளை மீள்வித்தல்.