"இருங்கூதிர் எதிர்வுகண்டு கருங்குழலி கவலையுற்றது"

     (இ-ள்) வீழ்பனிவாய் நெருப்பு இனம்மேய் - வீழாநின்ற பனியின் குளிருக்கு அஞ்சி மாந்தரெல்லாம் நெருப்புத்திரளைப் பொருந்தாநிற்ப; நெடுமால் எழில் தோன்றச்சென்று - நெடிய திருமாலினுடைய அழகு தன்னைக் கண்டார்க்குக் கண்கூடாகத் தோன்றும்படி சென்று; ஆங்கு நின்ற பொருப்பு இனம் ஏறி-எம்பெருமான் உறையும் அவ்விடத்தே நிற்கும் மலைக்கூட்டத்தின்கண் ஏறித் தவழ்ந்து; தமியரைப் பார்க்கும் புயலினம் - துணைபிரிந்து தனித்து நிற்பாரைத் தேடும் முகிற்கூட்டங்கள்; கருப்பினம் மேவும் பொழில் தில்லை மன்னன்கண் ஆர் அருளால் - கரும்புத்திரள் பொருந்தும் பொழிலையுடைய தில்லையின் மன்னவனாகிய இறைவனுடைய மிக்க அருளால்; விருப்பு இனம் மேவச் சென்றாரக்கும் - விருப்பத்தையுடைய தம்மினத்தார் தம்மால் உதவி பெற்றுப் பொருந்தும் வண்ணம் வினைமேற் சென்றுள்ள எம்பெருமானிடத்தும்; சென்று அல்குங்கொல் - சென்று தங்குமோ அங்ஙனம் தங்கின் அவர்நிலை என்னாம் என்பதாம்.

     (வி-ம்.) கரும்பினம் எனற்பாலது கருப்பினம் என்றாயிற்று. மேவ என்பது மெய் என மருவிற்று. நெருப்பினம் மேவுதலாவது குளிர்க் காற்றாது நெருப்பினை அணுகி இருத்தல். நெடுமால் - நெடிய திருமால், முகிலுக்குத் திருமால் உவமை. ஆங்கு என்றது