(உரை)
கைகோள் : களவு தலைவன் கூற்று

துறை : பிரிவுணர்த்தல்

     (இ-ம்.) இதற்கு, “ முன்னிலை யாக்கல் ” (தொல், களவி. சு0) எனவரும் நூற்பாவின்கண் ‘ தெளிவு அகப்படுத்தல் ’ எனவரும் விதி கொள்க.

11 : எழுகதிர்...................திருந்திழை

     (இ-ள்) எழுகதிர் விரிக்கும் - குணகடலில் எழாநின்ற இளஞாயிறுபோல ஒளியைப் பரப்புகின்ற ; மணிகெழு திருந்து இழை - மணிகள் பொருந்திய திருத்தஞ் செய்யப்பட்ட அணிகலன்களையுடைய நங்கையே என்க.

1-6 : நிலை............................அடைத்தும்

     (இ-ள்) நிலையுடை பெருந்திரு நேர்படு காலை - நிலைநிற்றலையுடைய பெருஞ் செல்வமானது தானே வந்தெய்திய காலத்தே ; காலால் தடுத்து - அதனைக் காலால் தள்ளி ; எதிர் கனன்று கறுத்தும் - அதற்கெதிராக நெஞ்சழன்று வெகுண்டும் ; நனிநிறை செல்வ நாடும் . ஒழியாது நிரம்பிய வளப்பத்தைத் தருகின்ற நாடும் ; நன்பொருளும் எதிர்பெறின் - நல்ல பொருள்களும் தாமே வந்து எதிர்ப்பட்ட விடத்தே ; கண்சிவந்து எடுத்தும் அவை களைந்தும் - கண் சிவக்கும்படி சினந்தும் அவையிற்றை எடுத்தெறிந்தும் ; தாமரை நிதியும் வால்வளை தளமும்பதுமநிதியும் வெள்ளிய சங்கநிதியும் ; இல்லம் புகுதலில் - தாமே வந்து வீட்டில் புகுமிடத்தே ; இருங்கதவு அடைத்தும் - அவை புகுதாதபடி பெரிய கதவுகளை அடைத்துத் தடுத்து்ம் என்க,

     (வி-ம்.) நிலையாமையே இயல்பாயுள்ள செல்வத்தினும் மேலாய செல்வம் என்பான் நிலையுடைப் பெருந்திரு என்றான். அதற்கு நேர்படுதல் அரிது என்பான் - நேர்படு காலை என்றான், நனிநிறைந்த செல்வத்தையுடைய நாடு என்க. அஃதாவது நாடாவளத்தையுடைய நாடு, நன்பொருள் என்றது படை, குடி, கூழ், அமைச்சு, நட்பு, அரண் என்பன. தாமரை நிதி - பதமநிதி. வளைத்தனம் - சங்கநிதி

7-10 : அரி....................................உளரேல்

     (இ-ள்) அரி அயன் அமரர் - திருமாலும் பிரமனும் தேவர்களும், மலைவடம் பூட்டி - மந்தரமலையாகிய மத்தின்கண் வாசுகி என்னும் வடத்தைப் பூட்டி ; பெருங்கடல் வயிறு கிடங்கு எழ - பெரிய கடலினது வயிறானது பள்ளமாகும்படி ; கடைந்த அமுதம் உள்கையில் உதவுழி ஊற்றியும் - கடைந்ததனாற்றிரணட் அமிழ்தத்தை உள்ளங்கையில் கிடைக்கும் பொழுது அதனைத் தரையிற் கவிழ்த்தும் ; மெய்உலகு இரண்டினுள் - மெய்மையுள்ள விண்ணுமாகிய இரண்டுலகத்தினும் ; செய்குநர் உளரேல் - செய்தார் உண்டாயிருந்தால் என்க.

     (வி-ம்.) திருமால் முதலிய தேவர்கள் திருப்பாற் கடலில்கண் மந்தரமலையை மத்தாக நட்டு வாசுகியைக் கடை கயிறாகக்கொண்டு அமுதம் கடைந்தனர் என்பத புராண வரலாறு. வயிறு . ஈண்டு உன்னிடம், கிடங்கு - பள்ளம், உள்கை - உள்ளங்கை, பெருந்திரு முதலியன தாமே வந்தெய்தும் பொழுது அவற்றை வேண்டாமென விடுப்போர் மண்ணிலும் விண்ணிலும் இல்லை என்றவாறு,

13-17: முழுதுற............................அகன்றிடலும்

     (இ-ள்) முழுதுஉற நிறைந்த பொருள் - உள்ளும் புறமுமாக எங்கும் நிறைந்துள்ள சிவமென்னும் பொருளை ; மனம் நிறுத்திமுன் வேடம் துறவா - தன் நெஞ்சின்கண்ணே நிலைபெற வைத்தும் தாம் முன்பு தழுவிய சமண சமயத்திற்குரிய வேடத்தைக் கைவிடாத ; விதிஉடை சாக்கியன் - முறைமையையுடைய சாக்கிய நாயனார் ; அருள்கரை காணா - திருவருள் என்னும் கரையைக் கண்டு ; அன்பு என்னும் பெருங்கடல் - அன்பாகிய பெரிய கடலானது ; பலநாள் பெருகி - நெடுங்காலமாகப் பெருக்கெடுத்து ; ஒருநாள் உடைபட்டுக் கரைநிலை பெறாமல் கைகடந்து செயலற்றுப் போதலும் என்க.

     (வி-ம்.) முழுதுற நிறைந்த பொருள் என்றது அங்கிங்கெனாதபடி எங்கும் நிறைந்த இறைவனை முன்வேடம் - சாக்கிய நாயனார் முன்னர்த் தழுவியிருந்த சமணத் துறவிவேடம், அஃதாவது தோமரு கடிஞையும் சுவன்மேல் அறுவையும் கைப்பீலியும் பாயுடையும் உறியும் பிறவும் உடைய வேடம் என்க. காணா . கண்டு. கையகன்றிடல் - எல்லை கடத்தல்.

18-25: எடுத்தடை......................................கடலும்

     (இ-ள்) எடுத்து அடைகல் மலர் அவை தொடுத்துச் சாத்திய - பொறுக்கிச் சேர்த்து வைத்த கல்லாகிய மலர்களைத் தொடர்ச்சியாக எறிந்து வழிபாடு செய்த ; இணையாப் பேரொளி கூடல்மாமணி - ஒப்பில்லாத பேரொளியாகிய மதுரையிலுள்ள கடவுள் மணி ; குலம்மலைக் கன்னி என்று அருள் குடியிருக்கும் - மேன்மையாகிய மலைமகள் என்று பெயர் கூறப்பட்டுத் திருவருள் பரியாதிருக்கின்ற ; விதிநிறை தவறா ஒருபங்கு உடைமையும் - வேதத்தால் விதிக்கப்பட்ட பெருமை தவறாத ஒரு பாகமுடைய தன்மையும் பறவை செல்லாது நெடுமுகனாகிய அன்னப்பறவை செல்லாமல் நெடிய வான முகட்டைக் கடந்து அப்பாற் சென்ற திருமுடியினின்னும் வீழ்கின்ற அழகிய கங்கையாற்றின் துறையும் ; நெடும்பகல் ஊழி நினைவுடன் நீந்தினும் அருங்கரை இறந்த ஆகமக் கடலும் - பயில்வோர் நெடுங்காலமாகிய பல்லூழி காலம் நினைப்புடனே நீந்திச் சென்றாலும் அருமையாகிய கரைகாணக் கூடாத சிவாகமம் என்னும் கடலும் என்க,

     (வி-ம்.) அடைகல் - சேர்த்து வைத்த கல், சாக்கிய நாயனரால் கல்மலரால் வழிபாடு செய்யப்பட்ட கூடல் மாமணி என்க, மணி - மாணிக்கம். கடவுளருள் வைத்து மாணிக்கம் போன்ற கடவுள் என்பது கருத்து. மலைக்கன்னி - பார்ப்பதி. நின்ற - பெருமை. பறவை - இறைவனுடைய முடியைக் காணச்சென்ற நான்முகனாகிய அன்னப் பறவை எனக். சேகரம் - முடி. திருநதி என்றது கங்கைப் பேரியாற்றினை. ஆகமம் - சிவாகமம்.

26-31: இளங்கோ......................................திரிந்தே

     (இ-ள்) இளம் கோவினர்கள் இரண்டு அறிபெயரும் - இளங் கடவுளராகிய படைத்தல் அழித்தல் என்னும் இரு தொழிலையும் அறிந்த நான்முகனும் திருமாலும் ஆகிய இருவரும் ; அன்னமும் பன்றியும் ஒல்லையில் எடுத்து - அன்னமாகவும் பன்றியாகவும் விரைந்து உருவெடுத்துக்கொண்டு ; பறந்தும் அகழ்ந்தும் படி இது என்னா - விண்ணில் பறந்தும் மண்ணைத் தோண்டியும் அளவு இஃதாம் என்று ; அறிவு அகன்று உயர்ந்த கழல்மணி முடியும் - கூறவியலாதபடி அவர்களுடைய அறிவினையும் கடந்து அப்பாற்பட்டுள்ள வெற்றிக் கழலணிந்த திருவடிகளையும் அழகிய முடியினையும் ; உடைமையன் பொற்கழல் பேணி அருள் திரிந்து அடையலர் மனம்போல - உடையவனது பொன்னடியை வழிபட்டு அவன் அருளை அடையாமல் மாறுபட்டு அவ்வடியை அடையாத மடவோர் நெஞ்சு போல என்க.

     (வி-ம்.) முழு முதற்கடவுளின் ஆனைவழி நின்று தொழில் செய்தலின் நான்முகனும் திருமாலும் இளங்கோவினர் எனப்பட்டனர். இரண்டு - படைப்பும் அழிப்புமாகிய இரண்டு தொழில்கள். அன்னமும் பன்றியுமாக உருவெடுத்து என்க. படி - ஒப்புமாம். கழலும் மணிமுடியும் என்க.

12: நின்..........................ஆகுவன்

     (இ-ள்) நின் பிரிவு உள்ளும் மனன் உளன் ஆகுவன் - நின்னைப் பிரிதலுக்கு நினையா நின்ற நெஞ்சமுடையேன் ஆக என்க.

     (வி-ம்.) கழல்பேணி அடையலர் மனம்போல மனன் உளனாகுவன் என இயைத்துக்கொள்க.

     இதனை, திருந்திழையே ! பெருந்திருவைக் கறுத்தும், நாடும் பொருளும் பெறின், கண்சிவந்து களைந்தும், நிதியுந்தனமும் புகின் கதவடைத்தும், அமுத முதவுழி யூற்றியும், செய்தாருளரேல், கூடன் மாமணியாகிய வுடைமையன் கழல்பேணி, அடையலரது, அருள் திரிந்த மனம்போல நிற்பிரிவுள்ளு மனனுளனாவேனெ வினை முடிவு செய்க. மெய்ப்பாடும் பயனும் அவை.