(உரை)
கைகோள் : களவு, தலைவன் கூற்று

துறை : பதிபரிசுரைத்தல்

     (இ-ம்.) இதனை, “ ஒன்றாத் தமரினுந் ” (தொல். அகத். சக) எனவரும் நூற்பாவின்கண் ‘அப்பாற் பட்ட ஒரு திறத்தானும்’ என்பதன்கண் அமைத்துக்கொள்க.

35 : முத்து..............................கொடியே

     (இ-ள்) முத்துளழில் - முத்துப்போன்ற அழகையுடைய ; நகைக்கொடியே - பற்களையுடைய பூங்கொடிபோல்வாய் என்க.

     (வி-ம்.) எழில் - அழகு, நகை : பல், கொடி : ஆகுபெயர்

1-4 : எரி ....................................... நோக்குக.

     (இ-ள்) எரி தெறற்கு அரியபொடி பொறுத்து இயங்கினை - நீ இதுகாறும் தீயும் வெப்பத்தால் வெல்லதற்கரிய இப்பாலை நிலத்துப் பாற்பொடியின் வெப்பத்தினை எங்ஙனமோ பொறுத்துக்கொண்டு என்னொடு நடந்தனை ; முகில் தலை சுமந்த - முகில்களைத் தன் தலையிலே சுமந்துள்ள ; ஞிமிறு எழுந்து இசைக்கும் பொங்கருள் - வண்டுகள் எழுந்து முரலுகின்ற இச்சோலையினிடத்தே ; படுத்த மலர்கால் பொருந்துக - நிலத்திலே பரப்பப்பட்டுள்ள மலரின்மேல் நின்காலை வைத்திடுக; கருங்கடத்து எதிர்ந்த கொடும்புலிக்கு ஒதுங்கினை - நீ இதகாறும் கரிய பாலைக்காட்டினிடத்து எதிர்த்த கொடிய புலிக்கு அஞ்சி ஒதுங்கா நின்றனையல்லையோ; வரியுடல் செங்கண் வரால் இனம் எதிர்ப்ப- வரிகளையுடைய உடலினையும் சிவந்த கண்களையுமுடையவரால் மீன் கூட்டங்கள் தம்மைத் தாக்குதலாலே; உழவக் கணத்தர் உடைவது நோக்குக - ஈண்டு உழவர் கூட்டத்திலுள்ளோர் புறமிட்டோடுவதைக் காண்பாயாக என்க.

     (வி-ம்.) எரி - நெருப்பு. நெருப்பாலும் வெல்லுதற்கரிய வெப்பத்தையுடைய பொடி என்க. இயங்குதல் - கடத்தல், முகில் தலைசுமந்த பொங்கர்-சோலை, படுத்த மலர்-பரப்பப்பட்ட மலர். கடம்காடு, அஞ்சி ஒதுங்கின என்க. வரி.-கோடு, வரால்- ஒருவகை மீன். கணத்தர் - கூட்டத்தார். உடைதல் - புறமிட்டோடுதல்

7 - 13 : கொலைஞர்.................................காண்க.

     (இ-ள்) கொலைஞர் பொலிந்த கொடித்தோர்க்கு அணங்கினை - நீ இதுகாறும் மறவர் ஏறிவந்த கொடியுயையுடைய தேர்களைக் கண்டு அஞ்சி வருத்தமுற்றனை இனி ; வேதியர் நிதி மிக விதிமகம் முற்றி - மறையோர் உலகின்கண் செல்வம் பெருகும் பொருட்டு விதிகளையுடைய கேள்விகளைச் செய்துமுடித்து ; அவ்விரதம் துறையாடுதல் கெழுமி-அந்த நோன்பின் பொருட்டு நீராடுதலைச் செய்து ; பொன்உருள் வையம் போவது காண்க- பொன்னாலியன்ற உருள்களையுடைய தேரில் ஏறிச் செல்வதனைக் கண்டு மகிழ்வாயாக ; ஆறுஅலை எயினர் அமர்கலிக்கு அழுங்கினை - நீ இதுகாறும் வழிபறிப்போராகிய எயினரது போரொலிக்கு அஞ்சினை வருந்தினை ; பணைத்துஎழு சாலி நெருங்குபு புகுந்து- இனி நீ அடி பருத்து வளர்ந்த நெற்பயிர்களினூடே நெருங்கிப்புகுந்து ; கழுநீர் கலைஞர் கம்பலை காண்க - செங்கழுநீராகிய களைகளைப் பறிக்கும் உழத்தியருடைய ஆரவாரத்தைக் காண்பாயாக என்க.

     (வி-ம்.) கொலைஞர் - ஈண்டு எயினர். அணங்குதல் - வருந்துதல், வேதியர் வேள்வி செய்தலால் உலகில் வளம் பெருகும் என்பது பற்றி வேதியர் நிதிமிக மகம் முற்றி என்றார். நிதி - செல்வம், “கற்றாங்கு எரியோம்பிக் கலியை வாராமே செற்றார் ” எனப் பிற சான்றோரும் ஒதுதலுணர்க மகம் - வேள்வி முற்றுதல் செய்துமுடித்தல். துறையாடுதல் - நீராடுதல் கெழுமி - பொருந்தி. வையம் - தேர், வண்டியுமாம். ஆறலை எயினர் - வழிபறிக்கும் பாலைநிலமாக்கள், அமர்க்கலி- போரொலி சாலி - நெற்பயிர், கழுநீர் - செங்கழுநீர், கலைஞர் - களைபறிப்போர், கம்பலை - ஆரவாரம்.

14-22: தழல்.................................கேண்மதி

     (இ-ள்) தழல் தலை பழுத்தபால் முரம்பு அடுத்தனை - நீ இதுகாறும் தீப்பிழம்பு தம்மிடத்தே கனிந்துள்ள பருக்கைக் கற்களையுடைய மேட்டு நிலத்தின்மேல் நடந்துவந்தனை, இனி ; சுரி முகம் குழுவளை நிலவு எழச் சொரிந்த -சுரிந்த முகத்தினையுடைய சங்குகள் நிலவொளி தவழும்படி ஈன்ற ; குளிர் வெள் தரளம் குவால் இவை காண்க - குளிர்ந்த வெண்முத்துக் குவியலாகிய இவற்றைக் கண்டு மகிழ்வாயாக ; அலகை நெடு இரதம் புனல் எனக் காட்டினை - நீ பாலையின்கண் பேய்த்தேராகிய நெடிய கானலைக் கண்டு மயங்கி உதோ காண்ிமின் நீர்நிலையை என்று எனக்குக் காட்டா நின்றனை ; வல்மீன் நெடகயல் பொதுவினை அகத்துக்கிடங்கு எனப் பெயரிய கருங்கடல் காண்க - ஈண்டு முதலையும் நெடிய கயல்மீனும் பொதுவாகத் தொழில் கூறப்பட்ட கரிய கடலைக் கண்டு மகிழ்வாயாக; காகளம் பூசல் துடி ஒலி ஏற்றனை. நீ இதுகாறுங் காகள வோசையையும் போர்ப்பறை முழக்கினையும் செவியேற்று அஞ்சினை இனி ; குடுமிஅம் சென்னியர் கருமுகில் விளர்ப்பக் கிடைமுறை யெடுக்கும் மறையொலி கேள்மதி- குடுமியையுடைய அழகிய தலையினையுடைய பார்ப்பனர் கரிய முகில்களும் நாணும்படி வேதப்பள்ளியில் முறைப்படி ஓதாநின்ற வேதங்களினது ஓசையைக் கேட்டு மகிழ்வாயாக என்க.

     (வி-ம்.) தழல் - தீ, தலை - உச்சியுமாம், பரல் - பருக்கை, முரம்பு- மேட்டுநிலம் வளை - சங்கு. தரளக் குவால் - முத்துக் குவியல், நெடிய அலகை இரதம் என்க. அலகை இரதம் - பேய்த்தேர், அஃதாவது கானல் நீர், வன்மீன்- முதலை, கயல் - ஒருவகை மீன், வன்மீன் என்றதனால் கயலை மென்மீன் எனக்கொள்க, எனவே வன்மீனும் மென்மீனும் பொதுவாகக் கொண்டு வினைசெய்தலையுடைய அகத்தையுடைய கிடங்கு என்க, கிடங்கு-அகழி. அதன் பெருமைகூறுவான் கிடங்கெனப் பெயரிய கருங்கடல் என்றான். காகளம்- ஊதுகொம்பு. துடி - ஒருவகைத்தோற்கருவி. இது போர்க்களத்தே முழக்கப்படுதலால் பூசற்றுடி என்றான் குடுமி - உச்சிக்குடுமி, இதனைச் சிகையென்பர், முகில் நம்முடைய முழக்கம் இவ்வேத முழக்கத்திற்கு நிகராகாது என்று நாணும் என்பது கருத்து கிடை - பள்ளி, மதி : முன்னிலையசை.

23-28: அமரர்.................................புதைப்ப

     (இ-ள்) அமரர்கள் முனிக்கணத்து அவை முன்தவறு புரிந்து - தேவர்களும் முனிவர்குழாமு்ம் முன்னொரு காலத்தே தவறு செய்யத் தொடங்கியபடியால்; உடன் உமைகண் புதைப்ப-உடனே உமையம்மையார் கண்களை மூடாநிற்ப; உமையும் ஆடகச் சயிலச் சேகரந் தொடர்ந்த - அவ்வுமையு்ம் பொன்மலைக் குவட்டினைத் தொடர்ந்த ; ஒற்றை அம் பசுங்கழை ஒல்கிய போல - ஒன்றாகிய அழகிய மூங்கிலானது அசைவதுபோல ; உலகு உயிர்க்கு உயிர் எனும் - உலகில் வாழும் உயிர்களுக்கெல்லாம் உயிர் என்று சொல்லப்படுகின்ற ; திருவுரு அணைந்து வளைக்கரங் கொடு கண் புதைப்ப - அழகிய இறைவனுடைய திருமேனியை அணைந்து வளையலணிந்த தன் கைகளால் இறைவனுடைய கண்களை மூடாநிற்ப என்க.

     (வி-ம்.) கணத்து அவை - கணமாகிய கூட்டம், அமரரும் முனிவரும் தவறாக உமை கண்களை மூட என்க. ஆடகச் சயிலச் சேகரம் - பொன்மலைக் குவடு, கழை - மூங்கில், இது உமைக்கு உவமை. ஓல்குதல் - அசைதல். இறைவன் உயிர்களுக்கெல்லாம் உயிராய் மருகுவன் என்பதனை.

எனவரும் சித்தியாரானும் உணர்க.

28-35: அவ்வுழியே......................காண்

     (இ-ள்) அவ்வுழியே - அப்பொழுதே; உலகு இருள் துரக்கும் செஞ்சுடர் வெண்சுடர் பிரமன் உள்பட்ட நில உயிர் அனைத்தும் - உலகின்கண் பரந்த இளை அகற்றும் ஞாயிறும் திங்களும் பிரமன் முதலிய நிலைபேறுடைய உயிர் இனங்கள் எல்லாம் ; தமக்கு எனக் காட்டும் ஒளிக்கண் கெடலும் - தத்தமக்காகத் தனித்தனியே பொருள்களைக் காட்டும் ஒளியையுடைய கண் மழுங்கிப்போதலும்; அவர் மயங்கங் கண்டு - தேவர் முதலிய அவர்களின் மயக்கத்தை அறிந்து; அவர் கண்பெற - அவர்களெல்லாம் மீண்டும் கண்ணொளியைப் பெறும்படி; திருநுதல் கிழித்த தனி விழி நாயகன் - அழகிய நெற்றியினிடத்தே திறக்கப்பட்ட ஒப்பற்ற நெருப்புக்கண்ணையுடைய இறைவனாகிய சோமசுந்தரக்கடவுளால்; தாங்கிய கூடல் பெருநகர் இது ஈங்கு காண்க - பாதுகாத்தருளப் பட்ட பெரிய நகரம் இஃதாகும் இவ்விடத்தே அதனைக் கண்டு மகிழ்க என்க.

     (வி-ம்.) செஞ்சுடர் - ஞாயிறு வெண்சுடர் - திங்கள், காட்டும் - உலகப் பொருள்களைக் காட்டா நின்ற, அவர் - ஞாயிறு முதலியோர், மயங்குதல்- குருட்டுத்தன்மையால் அறிவுமயக்கங் கொள்ளுதல், நுதல்கிழித்த விழி தனிவிழி எனத் தனித்தனி கூட்டுக. நுதலைக் கிழித்துத் தோற்றுவித்த விழி என்க. மதுரைமாநகர் இதனை ஈங்குக் காண்க என்க.

     இதனை நகைக்கொடியே பொடி பொறுத்தியங்கினை ; மலர்கால் பொருந்துக. புலிக் கொதுங்கினை; ஈண்டு உழவக்கணத்தர் உடைவது நோக்குக கொலைஞர். தேர்க்கணங்கினை ஈண்டு வையம்போவது காண்க. எயினர், அமர்க்கலிக்கு அழுங்கினை ; ஈண்டுத் தரளக்குவால் இவை காண்க. நீ பேய்த்தேர் புனல் எனக் காட்டினை ; ஈண்டுக் கடல் காண்க. துடி ஒலி ஏற்றனை ; ஈண்டு மறை ஒலிகேள். இது கூடற்பெரு நகர் ; இதனை ஈங்குக் காண்க. என வினைமுடிவுசெய்க. மெய்ப்பாடும் பயனும் அவை.