(உரை)
கைகோள் : கற்பு. தோழிகூற்று

துறை: பிரிந்தமைகூறல்.

     (இ-ம்.) இதனை, “மரபுநிலை திரியாமாட்சியவாகி விரவும் பொருளும் விரவு மென்ப” (தொல்.அகத்-45) எனவரும் நூற்பாவினால் அமைத்துக்கொள்க.

1-3: மலரவன்..........................மடந்தை

     (இ-ள்) மலரவன் பனிக்கும் கவினும் - நான்முகன் இவ்வடிவு நம்மால் படைத்தற்கு அரிது என்று அஞ்சுதற்குக் காரணமான பேரழகும் ; குலமீன் அருகிய கற்பும் - வடமீனாகிய அருந்ததியினுடைய கற்பும் குறைந்ததென்று கூறுதற்குக் காரணமான சிறந்த கற்பும்; கருதி உள் நடுங்கி - நினைத்துப் பார்த்து இப்பேறு நம்மாற் பெறுதற்கியலாதென மனம் நடுங்கி ; திருமகள் மலர்புகும் ஒருதனி மடந்தை - திருமகளானவள் தாமரை மலரில் ஒளிதற்குக் காரணமான ஒப்பற்ற மங்கையே என்க.

     (வி-ம்.) மலரவன் - நான்முகன், பனித்தல் - நடுங்குதல், குலமீன் கற்பு என்க. கவினும் கற்புங் கண்டு கருதிப்பார்த்துத் திருமகள் நடுங்கி மலர்புகுதற்குக் காரணமான மடந்தை என்க. மடந்தை: விளி.

3-6: இன்று...................................காதலர்

     (இ-ள்) இன்று - இற்றைநாள் ; இருகடல் ஓர்உழி மருவியது என்ன- இரண்டுகடல்கள் ஓரிடத்திலே சேர்ந்தாற் போலச்சேர்ந்த ; செருபடை வேந்தர்- போர்செய்தற்குரி படைகளையுடைய வேந்தருடைய ; முனைமேல் படர்ந்த நங்காதலர் - போரைக் கருதிச்சென்ற நம் தலைவருடைய என்க.

     (வி-ம்.) ஓருழி - ஓரிடத்தில், செரு - போர், முனை - போர் முனை, படர்தல் - செல்லுதல்.

6-9: முனை.........................கொண்டு

     (இ-ள்) முனைப்படை கனன்று - கூர்மை பொருந்திய படைக்கலமானது வெகுண்டு ; உடற்றும் - போர்செய்கின்ற ; எரியால் - நெருப்பால் ; முடம்படு நாஞ்சில் பொன்முகம் கிழித்த - வளைவுள்ள கலப்பையிற் பொருந்திய இரும்பாற் செய்த கொழுவினது நுனியாற் கிழிக்கப்பட்ட ; நெடுஞ்சால் போகி - நெடிய படைச்சாலின் வழியாகச் சென்று ; கடுங்கயல் துரக்கும் மங்கையர் - வேகமுள்ள கயல்மீன்கள் தம்மை ஓட்டுகின்ற மகளிருடைய ; குழைபெறு வள்ளையில்- பொற்குழையணிந்த செவியினையொத்த வள்ளைத்தண்டின்கண் ; தடைகொண்டு- தடைபட்டு என்க.

     (வி-ம்.) சால் - படைச்சால், அஃதாவது கலப்பை உழுத சுகடு - குழை: ஆகுபெயர் - குழையணிந்த செவி என்க. வள்ளை . ஒருவகை நீர்க்கொடி.

10-14: அவர்................................பெற்று.

     (இ-ள்) அவர் கருங்கண் என - அம்மகளிருடைய கண்ணைப்போல; தழைகுவளை, பூத்த - தழைத்த குவளை மலர்ந்த ; இருள் அகச்சோலையுள்- இருண்டுள்ள சோலையினுள் ; இரவு எனத் தங்கிய - இராப்பொழுதென்று கருதித் தங்கப் பெற்றவை ; அதன் சேக்கையுள் வதிபெறும் செங்கால் வெள்ளுடல் ஓதிமம் -அச்சோலையில் கட்டிய கூட்டினுள் உறைகின்ற சிவந்த காலினையும் வெள்ளிய உடலையுமுடைய அன்னமானது; தன்னுடைய பெடையென-தன்னுடைய பெடையன்னம் என்று கருதி ; பறைவரத் தழீஇப்பெற்று - சிறகில் அகப்படத் தழுவிப் பெற்று என்க.

     (வி-ம்.) அவர் - அம்மங்கையர், தழைகுவளை பூத்த என்க. இரவு - இராப்பொழுது, தங்கிய : பலவறிசொல், வதிதல் - தங்குதல், ஓதிமம் - அன்னம். பெடை - பெண் அன்னம், பறை - சிறகு.

14-18: உவை......................................காட்டி

     (இ-ள்) உவை தம் கம்பலைக்கு ஆற்றாது - அவ்வன்னங்களின் ஆரவாரத்தைப் பொறாமல் ; அகன்று - அவ்விடத்தினின்று நீங்கி ; தேக்கு வழிகண்ட கால்வழி இறந்து - அச்சோலையின் தேன் பெருக்கமானது தனக்கு வழியுண்டுபண்ணிய வாய்க்கால் வழியே சென்று ; பாசடை பூத்த கொள்ளம் புகுந்து -பாசிமலர்ந்த குழைந்த சேற்றில் புகுதாநிற்ப ; வள்துறை வானத்து எழில்மதி காட்டி -மிக்க நீர்த்துளியைச் சிந்துகின்ற வானத்தின்கண் எழாநின்ற அழகிய திங்களைக் காட்டி என்க.

     (வி-ம்.) உவை - அவை, கம்பலை - ஆரவாரம், தேம் + கு = தேக்கு. தேன் தனக்கு வழிகண்ட கால் என்க, கால் - வாய்க்கால், பாசடை - பாசி, கொள்ளம்- குழைசேறு, உறை - மழைத்துளி திங்களை உவமையாகக் காட்டி என்க. (8) கயல் சால் போகி வள்ளையில் தடைகொண்டு சோலையுள் இரவெனத் தங்கப்பெற்றவை அதன் சேக்கையுள் வதியும் அன்னத்தால் தழுவப்பெற்று அவற்றின் கம்பலைக்குவெகுருவிக் கால்வழிசென்று (17) (புகுந்து) புகுதாநிற்ப என புகுந்தென்னும் செய்தேனெச்சத்தை செயவெனெச்சமாக்கி ; இயைத்துக்கொள்க.

18-23: நிறை............................கூடல்

     (இ-ள்) நிறைசூல்வளை உளைந்து - நிரம்பிய சூலினையுடைய சங்கு வயிறு வருந்தி ; இடங்கரும் ஆமையும் - முதலையும் ஆமையும் ; எழுவெயில் கொளுவும் - காலையில் எழாநின்ற இளவெயில் காய்கின்ற ; மலைமுதுகு அன்ன- மலையினது முதுகையொத்த ; குலைமுகடு ஏறி - செய்கரையின் உச்சியில் ஏறி; முழுமதி உடுகணம் அகவயின் விழுங்கி உமிழ்வனபோல - முழுத்திங்கள் விண்மீன் கூட்டங்களைத் தன்னுள்ளே விழுங்கி மீண்டும் உமிழப்படுகின்றன போல ; கரிமுகம் சூல்வளை தாளம் சொரியும் - கரிந்த முகத்தையுடைய சூல்கொண்ட அச்சங்குகள் முத்துக்களை ஈனுதற்கிடனான ; பழனம் கூடல் - கழனிகளையுடைய மதுரையினிடத்தே என்க.

     (வி-ம்.) முழுமதி - முழுத்திங்கள், உடுக்கணம் - விண்மீன் கூட்டம், உமிழ்கின்றன - உமிழப்படுகின்றன. தரளம் - முத்து, (கஅ) நிரைவளை எழில்மதி காட்டி முகடேறித் தரளம் சொரியும் கூடல் என முடித்துக்கொள்க.

24-25: குவளைப்............................முகிழ்ப்ப

     (இ-ள்) குவளை நின்று அலர்ந்த - குவளைமலர் தங்கி விரிந்தாலொத்த; மறைஎழு குரலோன் - வேதம் பிறத்தற்கு இடமாகிய மிடற்றினையுடைய சிவபெருமான் ; இமையவர் வேண்ட - தேவர் வேண்டுதலால் ; ஒரு நகை முகிழ்ப்ப-ஒரு புன்முறுவல் தோற்றுவிப்ப என்க.

     (வி-ம்.) குவளைமலர் இறைவனுடைய மிடற்றில் அமைந்த கறைக்கு உவமை. குரல்-மிடறு. ஒரு நகை என்றது சினத்தாற்றோன்றிய புன்முறுவலை.

26-29: ஓருழி........................................மதிலே

     (இ-ள்) ஓருழி கூடாது - ஓரிடத்தே பொருந்தியிராமல ; உம்பரின் படர்ந்து- வானத்திலே யாண்டும் இயங்கி ; வான் உடைந்து உண்ணும் மறக்கொலை அரக்கர் -தேவர்களை அழித்துக் கொள்ளைகொண்டுண்ணுகின்ற கொடிய கொலைத்தொழிலை யுடைய அரக்கர்களுடைய ; முப்பெருமதில் பெற்றன அன்றோ - மூன்றாகிய பெரிய மதில்கள் பட்டபாடுபடும் அல்லவோ, முன் அந்நெருப்புக்கெதிரே ; மருவலர் அடைந்த-பகைவரால் அடைக்கப்பட்ட; மறம் கெழுமதில்- வலிமைபொருந்திய மதில்கள் என்க.

     (வி-ம்.) (5-6) செருப்படைவேந்தர் முனைமேல் படர்ந்த நங்காதல் முனைப்படைகனன்று உடற்று எரியால் (26) மருவலர் அடைந்த மதில் (24) குரலோன் நகைமுகிழ்ப்ப (25) அரக்கர் முப்பெருமதில் (27-28) பெற்றன அன்றோ என இயையும். ஓருழி - ஓரிடம் வான் : ஆகுபெயர், முப்பெருமதில் - திரிபுரம். மருவலர் - பகைவர் நந்தலைவர் வினைமுற்றிக் கடிதில்மீன்வர் என்பதுபட மருவலர்மதில் முப்புரங்கள் பட்டபாடுபடும் என்றாள்.

     இதனை, மடந்தையே ! முனைமேற் படர்ந்த காதலரது படையுடற்று மெரியால் எதிரே மருவலரடைந்த மறங்கெழு மதிலானது கூடல் மறையெழு குரலோன் ஒருநகை முகிழ்ப்ப அரக்கர் மும்மதில் பெற்றபடியாகுமன்றோவென வினைமுடிவு செய்க. மெய்ப்பாடும் பயனும் அவை.