நெறியாளர்க்கு  ஆயிரம்  அறிவு  புகட்டினும்  மறந்துபோய்த் தீவினையே
புரிவார்கள்.

      (வி-ரை.) ‘நல்ல மாட்டுக்கு ஓரடி! நல்ல மனிதருக்கு ஒரு சொல்! '
என்பது பழமொழி.

      (தொ-ரை.)  உரப்பார்க்கு  நலம்புரியும்  தண்டலையாரே -
அறிவாளிகட்கு நன்மையருளும் தண்டலையாரே!, ஒருமையாக இரப்பார்க்கு
வெண்சோறு பஞ்சம் உண்டோ - ஒருதலையாகப் பிச்சை யெடுப்போர்க்கு
வெறுஞ் சோற்றுக்கும் பஞ்சமா?, ஒருக்காலும் இல்லை - எப்போதும் இராது,
(அதுபோல),கரப்பார்க்கு நல்ல கதி வருவது இல்லை - வஞ்சகர்க்கு நல்ல
நிலை  கிடைப்பதில்லை,  கடல்சூழ்  வையம்  செங்கோலின்  புரப்பார்க்கு
முடிவிலே  சுவர்க்கம் அல்லால் நரகம்  இல்லை - கடலாற்  சூழப்பட்ட
உலகத்திலே செங்கோலால் ஆட்சி செய்வார்க்கு இறுதியிலே சுவர்க்கமேயன்றி
நரகம் வராது, இது பொய் அன்று - இது பொய்யாகாது.

      (வி-ரை.) உரம் - அறிவு. உரம் பார் - அறிஞர் உலகம். (உரம் + பார்
= உரைப்பார்) ‘உரவார்க்கு' என்பது எதுகை நோக்கி ‘உரப்பார்க்கு'  என
ஆயது என்றும் கூறலாம். (கரவு - மறைவு). உள்ளத்திலே ஒன்றும் வெளியிலே
ஒன்றுமாகக் கரப்போர் வஞ்சகர். ‘இரப்பாள் சோற்றுக்கு வெண்சோறு
பஞ்சமா?' என்பது பழமொழி.