(தொ-ரை.) பற்பலர்க்கு வாழ்வுதரும் தண்டலையாரே - பலதுறைப்
பட்டவர்களுக்கும் வாழ்வையருளும் தண்டலையாரே!, விற்பனர்க்கு வாழ்வு
வந்தால் மிக வணங்கி மிகவும் கண்ணோட்டம் செய்வார் - அறிவாளிகளுக்கு
வாழ்வு நேர்ந்தால்  மிகவும்  வணக்கமாக  யாரிடத்திலும்  நாகரிகமாக
நடந்துகொள்வர்; சொற்பருக்கு வாழ்வு வந்தால் கண் தெரியாது இறுமாந்து
துன்பம் செய்வார் - அறிவிலார்க்கு வாழ்வு நேரின் எதனையும் நோக்காமல்
செருக்குடன் யாவருக்கும் இடையூறு செய்வார்கள்; பண்பு இல்லாத அற்பருக்கு
வாழ்வுவந்தால் அர்த்தராத்திரி குடைமேல் ஆகும் - நற்குணம் இல்லாத
கீழ்மக்களுக்கு வாழ்வு கிடைத்தால் நள்ளிரவிலே தலைக்குமேற் குடை
இருக்கும்.

      (வி-ரை.) ஆகுந்தானே : தான், ஏ : அசைகள். கண்ணோட்டம் :
தம்மிடம் பழகியவர் செய்யும் தவறுகளைப் பொறுத்தல். அதுவே நாகரிகம்.
‘பெயக்கண்டும் நஞ்சு உண்டு அமைவர், நயத்தக்க, நாகரிகம் வேண்டு பவர்'
என்பர் திருவள்ளுவர். ‘அற்பருக்கு வாழ்வு வந்தால் அர்த்தராத்திரியிற்
குடைபிடிப்பர்' என்பது பழமொழி.