(தொ-ரை.) சேண்  இலகும்  மதிச்  சடையார்  தண்டலையார்
வளநாட்டில் - வானில் உலவும் பிறைத்திங்களணிந்த  சடையினரான
தண்டலையாரின் வளம் பொருந்திய நாட்டில், சிறந்த பூணின் காணவரும்
நாணுடையார் கனம் உடையார் அல்லாதார் கருமம் எல்லாம் - சிறப்பு மிக்க
அணிகலன் போலக் காணப்படும் நாணமும் பெருமையும் இல்லாதவரின்
செயல்கள் யாவும், ஆண் அவலம் பெண் அவலம் ஆடிய கூத்து அவலம்
என அலைந்து கேடு ஆம் - ‘ஆடவரும் வீணர்! பெண்டிரும் வீணர்!
அவர்கள் நடத்திய கூத்தும் வீண்!' எனுமாறு அலைவுற்றுக் கேடு ஆகும்;
(அச்செயல்), நாணம் இல்லாக் கூத்தியர்க்கு நாலு திக்கும் வாயில் எனும்
நடத்தை ஆம் - வெட்கம் அற்ற கூத்தாடிச்சிகட்கு நான்கு திசையினும் வழி
என்னுமாறு ஆய்விடும்.

      (வி-ரை.) நன்றாகக் கூத்தாடும் திறமையற்ற கூத்தாடும் பெண்டிர்
தம்மைப் பலரும் பழிக்கும்போது வெட்கித் திசை நோக்காமல் ஓடுவர்;
அதுபோல நாணமும் மானமும் இல்லார் கருமமும் பலரும் பழிக்கும்படி
வீணாகும் என்க. ‘ஆணவலம்! வெண்ணவலம்; ஆடிய கூத்து அவலம்!,
‘நாணமில்லாக் கூத்தியர்க்கு நாலுதிக்கும் வாயில்' என்பவை
பழமொழிகள் போலும்.