கண்டு ஒளித்திடுவார்; ஒன்றும் பேசவும் மாட்டார் (எனினும்), இளைத்தவன்
பெண்டீர் என்றால் எல்லோர்க்கும் மச் சினியாய் இயம்புவார் - ஆற்றலற்றவன்
மனைவியெனிலோ யாவருக்கும் மைத்துனியாகக் கொண்டு நகையாடுவர்;
(ஆகையால்), களித்துவரும் செல்வருக்கு வலிமையுண்டு - களிப்புடன் வரும்
செல்வர்களுக்கு ஆற்றலுண்டு; மிடியருக்குக் கனந்தான் உண்டோ -
ஏழைகட்கு அப் பெருமை உண்டாகுமோ?

      (வி-ரை.) சிவபெருமான் மேருமலையை (திரிபுரமெரிக்கும் போது)
வில்லாக வளைத்ததனால், வளைத்தமலை எனும் சிலையார், என்றார்.
‘இளைத்தவன் பெண்டாட்டி எல்லோருக்கும் மைத்துனி' என்பது
பழமொழி.

      (தொ-ரை.) இந்து உலவும் சடையாரே - பிறைமதி விளையாடும்
சடையினரே! தண்டலையாரே!, ஈன்ற தாயின் அந்த முலைக்குத்துவலி
சவலைமகவோ சிறிதும் அறிந்திடாதே - பெற்ற அன்னையின் முலைக்குத்து
நோயைச் சவலைப்பிள்ளை கொஞ்சமும் அறியாது; (அதுபோல), நொந்தவரும்
பசித்தவரும் விருந்தினரும் விரகினரும் நோயுள்ளோரும் - வருந்தினோர்,
பசித்தோர், விருந்துண்ண வந்தோர், காமுகர், நோயினர் ஆகியோர்; தந்தமது
வருத்தம் அல்லால் பிறருடைய வருத்தமது சற்றும் எண்ணார் - தங்கள்
வருத்தத்தை அன்றி மற்றவர்களின் வருத்தத்தைச் சிறிதும் நினையார்.