99. சிவமூர்த்தி

பிறைசூடி, உமை நேசன், விடை ஊர்தி, நடம் இடும்
     பெரியன், உயர் வதுவை வடிவன்
  பிச்சாடனன், காமதகனன், மறலியை வென்ற
     பெம்மான், புரந்தகித்தோன்,
மறமலி சலந்தரனை மாய்த்தவன், பிரமன் முடி
     வௌவினோன், வீரேசுரன்,
  மருவு நரசிங்கத்தை வென்ற அரன், உமை பாகன்
     வனசரன், கங்காளனே,
விறல் மேவு சண்டேச ரட்சகன், கடுமாந்தி
     மிக்க சக்கரம் உதவினோன்,
  விநாயகனுக்கு அருள் செய்தோன் குகன் உமையுடன் கூடி
     மிளிர் ஏக பாதன், சுகன்,
அறிவரிய தட்சிணா மூர்த்தியொடு இலிங்கம் ஆம்
     ஐயனே! அருமை மதவேள்
  அனுதினமும் மனதில் நினைதரு சதுர கிரிவளர்
     அறப்பளீசுர தேவனே!